E drama humano di Ukraine ta parti di e totalidad mundial
*Mas y mas certeza cu Merca no a vota pa partido politico
*Guaido vs. Maduro ta ilustra e realidad regional lubida
ORANJESTAD (AAN) — Na 2022 a keda demostra cu desaroyonan internacional por tin mucho mas impacto riba Aruba cu henter un programa di gobernacion di un Gobierno di Aruba.
Esaki ta un realidad cu a conta pa henter mundo, domina pa condicionnan mundial cu ta decisivo pa e maneho cu paisnan ta hiba.
Kico ta pasa den nos region, awe ta mas importante cu nunca, sigur si nos ta biba den porta di Venezuela.
Ora papia di Guera di Ukraine, e hecho cu Aruba no a participa directamente, ta haci cu no tin tanto atencion pa loke e por nifica.
Mientrastanto Aruba ta biba den porta di Venezuela, cu ta baluarte di Rusia manera semper DIARIO a ilustra.
Aruba na mes momento ta depende di Merca pa su economia den un mundo sumamente confuso cu sigur ta bini dilanti den e hecho cu na 2022, Merca a manda un delegacion Venezuela pa papia aparentemente cu Maduro riba azeta cu Venezuela ta produci.
E asunto a perde for di bista mientras Merca a bay eleccion pa cantidad di puesto importante, na mitar caminda pa su proximo eleccion presidencial.
Sinembargo, na e momentonan aki, region di Caribe ta mira e gobernacion di Venezuela y di Merca pa motibo di e relacion sumamente estrecho cu tin entre Venezuela y Rusia y e forma con Iran ta bira practicamente partner di gobernacion di Nicolas Maduro cu riba tur tereno, hasta di estudio avansa, ta yega na acuerdonan cu Iran.
Esaki ta duna un prueba cu cada rato e influencia cu Iran por eherce riba Venezuela, ta bira mas grandi pero tambe e resultadonan directo cu e por tin pa Aruba.
Gobierno di Iran, cu ta den problema serio cu mes Pueblo, ta un baluarte pa Maduro, cu Merca no ta reconoce como presidente.
Esaki ta e aspecto mas importante cu mester tene na bista den tur discusion actual.
Pa Gobierno Mericano, mescos cu pa un cantidad grandi di pais na mundo, Maduro no tin autoridad di Presidente na Venezuela.
Pero ta cu Maduro, paisnan democratico ta sigui atende mientras Maduro ta hunga cu e rikeza petrolero di Venezuela y su relacion directo cu Rusia.
Kico ta bay pasa? Un pregunta serio si realisa cu den e ultimo eleccionnan na Merca, Pueblo no a vota pa partido politico obviamente pero den mayoria di caso pa e candidato presidencial di nan preferencia.
Pues Midterm, cu a entrega Democratnan un victoria minimo, a haci cu Presidente Biden mester profila su mes na forma sumamente aserta den e conflicto mundial, cu ta percura pa un situacion dificil den porta di Aruba.
Por papia hasta di un situacion peligroso y circumstancianan cu Aruba mester conoce den detaye.
Si Venezuela, Iran y Rusia uni pa medio di Maduro den un cooperacion di educacion, kico esaki ta nifica pa e studiantenan Arubano?
E situacion ta mucho mas serio cu ta pensa. Na Nacionnan Uni, Venezuela por duna sosten total na Rusia. Pero e Presidente di Venezuela no ta wordo reconoce dor di mundo liber, cu un dia a scoge pa Guado como Presidente di Venezuela pa despues henter e proceso electoral di Venezuela bira un paharito cu ta bula den tur direccion.
Den un situacion mundial sumamente dificil, Biden sigur lo mester duna mas expresion na e politica Mericano enfrente Maduro, e baluarte di Rusia y di Iran den porta di Aruba cu mester presta bon atencion, na e resultadonan cu e realidad aki ta encera.
