Infrastructura ta crea e fundeshi pa desaroyo di Aruba

Proyecto ex-Esso Lagoen na Playa:

ORANJESTAD (AAN): Desaroyo sostenibel ta cuminsa cu un fundeshi fuerte. Esaki tabata e mensahe principal di Minister di Infrastructura, Rene Herde, durante e presentacion di e proyecto pa renovacion di e ex-gasoline station den centro di Oranjestad.

   Segun Minister Herde, e responsabilidad principal di Ministerio di Infrastructura ta crea e condicionnan necesario pa permiti desaroyo tuma lugar. Esaki no solamente ta inclui inversion den infrastructura, pero tambe crea e instrumentonan y facilidadnan cu ta permiti iniciativa publico y priva florece.

   "Nos tarea ta crea e condicionnan pa desaroyo por sosode. Ora e fundeshi ta bon, inversion y iniciativa por sigui naturalmente," Minister Herde a expresa.

   E minister a reconoce cu proyectonan di e magnitud aki no ta realisa di un dia pa otro. Nan ta exigi planificacion, coordinacion entre diferente departamento y cumplimento di tur e procedimentonan legal. Sinembargo, el a enfatisa cu Gobierno ta sigui traha activamente pa acelera e procesonan, respetando e marco legal y garantisando cu e proyectonan por avansa cu responsabilidad.

   E renovacion di e ex-gasoline station ta forma parti di un vision mas amplio pa revitalisa centro di Oranjestad. Den e contexto ey, Gobierno ta sigui ehecuta un serie di inversion importante, incluyendo restauracion di Fort Zoutman y Willem III Toren, renovacion di Wilhelminastraat, expansion di Parlamento di Aruba y otro proyectonan cu ta fortalece e balor historico, cultural y economico di e centro di ciudad.

   Segun Minister Herde, e diferente iniciativa nan ta mustra cu Gobierno ta creando e base necesario pa un desaroyo ordena y duradero, den cual infrastructura ta desempeña un rol esencial pa impulsa inversion, actividad economico y un centro di ciudad mas atractivo pa residente y bishitante.