Director EPB-Hato Erwin Lopez:
- Eerste klas ta yen caba y tweede ta casi yen
- Mayornan cu no a inscribi nan yiunan ainda por haci’e Dialuna awo
ORANJESTAD (AAN) Director di EPB-Oranjestad, señor Erwin Lopez, pa pidi comunidad pa tuma nota cu EPB- Hato lo no habri Diahuebs venidero, pero lo habri e proximo siman riba Dialuna dia 24 di Augustus awo.
“Nos ta warda tur e muchanan Dialuna for di mainta trempan y docentenan si Diahuebs 20 nos ta warda nan na scol caba, tin preparacion di cursonan cu mester wordo duna pa recapacitacion di docentenan.
Aña pa a cera hopi bon pa nos, resultadonan tabata bunita y nos ta spera e aña aki ta miho ainda. Mi kier gradici tur e docentenan cu aña pasa a traha hopi duro pa logra esaki, y di mes nos kier encurasha nan pa sigui cu e bon trabao pa e aña cu ta bin.
E aña aki si, nos mester bisa cu nos Eerste klasnan ta yen, y e tweede klasnan ta casi yen. P’esey mi kier suplica mayornan cu pa un of otro motibo no a bin inscribi nan yiu ainda, pa por fabor pasa Dialuna awo trempan, p’asina nos por regla un cupo pa nan, pasobra tin scarcedad di docente, y aworaki na Augustus, ta hopi dificil pa bo haya un docente. Casi tur docente tin trabao caba, anto pa bo habri un klas bo mester busca mas docente, anto bo tin cu rondia docente nobo”, Meneer Lopez a remarca.
Meneer Erwin Lopez a menciona cu tin diferente factor cu ta crea scarcedad di docente. “Tin di nan a kita fo’i scol, nan a haya un miho oportunidad, tin di nan a bay Bonaire, tin cu a bay Hulanda, tin di nos hendenan a bay traha na Colegio EPI, y tin di nan cu a bay cu pensioen. Y menos docente ta drenta trabao cu esnan cu ta laga nos. Dios gracias e cantidad di muchanan na Aruba ta bahando un tiki, y esey ta haci cu bo por haya lugar, ahusta, pero ta yega un momento cu esey no por pasa mas. Corda cu nos ta bay di 60 pa 65 aña y e grupo di docentenan cu a yega na 65 aña ta bayendo”, Meneer Lopez, a señala.
El a agrega cu scol ta habri aworaki cu rond do 600 alumno, nan a baha e cantidad cu casi 50 mucha e aña aki atrobe.
