Infra ta avansa cu reorganisacion pa fortalece e servicio na ciudadano

ORANJESTAD (AAN): Bou encargo di Minister di Vivienda, Infrastructura, Servicio Interno y Telecomunicacion, drs. Rene Herdé,

a traha intensivamente durante e ultimo lunanan, riba e desaroyo adicional di e Organisacion di Infra, cu e enfoke pa crea un organisacion mas eficiente, efectivo y prepara pa e desafionan di futuro y mas cu tur pa mehora e calidad di servicio na ciudadano.

E proceso ta concentra riba dos liña principal, e reorganisacion di e organisacion y e optimalisacion di proceso- y sistemanan. E trabou ta wordo realisa den colaboracion di Departamento di Recurso Humano (DRH) y Berenschot, cu participacion activo di diferente colega y management di e Organisacion di Infra.

E Organisacion di Infra ta forma parti, hunto cu e Ministerionan di Husticia y Labor, di un tereno piloto pa e implementacion di un forma di organisacion nobo. Actualmente ta trahariba e elaboracion di e puntonan di salida y e structura cu lo forma e base pa e organisacion nobo.

E reorganisacion no ta wordo trata como un proceso separa y pa e motibo aki, banda di e reorganisacion, Berenschot a haya encargo pa traha tambe riba e optimalisacion di e proceso- y sistemanan. E dos trayecto lo wordo implementa integralmente, cu e idea cu cambio den e organisacion y mehoracion di procesonan mester bay man den man cu otro.

Anteriormente a organisa diferente sesion cu e management di e Organisacion di Infra pa siguie labor ariba e puntonan di salida basa riba e decision pa reorganisacion. E sesionnan aki a brinda espacio pa analisa e tarea- y responsabilidadnan actual, identifica cambionan necesario y ricibi feedback di e personanan cu ta traha diariamente den e organisacion.

Un di e resultadonan importante ta pa crea mas claridad tocante e cambio di tareanan principal y secundario den diferente servicio. Den e proceso aki, a duna atencion special riba tereno di maneho, inspeccion y cumplimento di ley. Tambe a sondea posibilidad pa organisa cierto funcion- y trabounan di manera conhunto pa e tres servicionan envolvi, entre otro riba e area di funcion di apoyo y staff.

Alabes, a traha riba un structura di organisacion cu bista pa futuro. A considera un manera pa uni cierto partinan di organisacion, posiciona responsabilidadnan di un manera mas logico y organisa procesonan mas eficiente. E meta ta pa crea un structura cu ta conecta miho cu e desafionan di futuro y cu necesidad pa un servicio publico mas efectivo.

Un otro element importante den e proceso ta e desaroyo di un structura nobo di funcion pa construccion. DRH ta traha na nivel central riba un sistema cu ta inclui tanto funcionnan generico, cu ta aparece den diferente ministerio, como funcionnan specifico pa e tareanan particular di un ministerio.

Den e caso di e Organisacion di Infra, e funcionnan specific cu ta relaciona cu e trabounan di e organisacion entretanto a wordo elabora y manda DRH pa evaluacion.

E reorganisacion y optimalisacion aki tin como meta final pa hisa e calidad di servicio, reduci e cantidad di atraso y keho. Tambe pa aumenta e efectividad y eficiencia riba e tereno di Infrastructura y Planificacion pa urbanisacion.

E ambicion ta pa implementa e cambionan paso pa paso, cu e meta pa tin un gran parti di e trabou completa pa fin di 2026. Cu e proceso aki, e Organisacion di Infra ta pone un base pa un organisacion mas moderno, eficiente y prepara pa futuro, cu ta pone e servicio na ciudadano como un di e elementonan central di su desaroyo.