OPPA:
ORANJESTAD (AAN): E lucha pa un salario digno y un pension digno no por ta un obstaculo pa desaroyo economico di Aruba. E ta parti esencial di un sociedad husto y ekilibra, segun opinion di OPPA (Organisacion di Pensionado Publico di Aruba).
Tin un contradiccion cu mester wordo poni cla: durante añanan largo, e trahadornan cu salario minimo y e pensionadonan a carga e peso di e aumento constante di costo di bida. Awor cu ta papia di mehora nan condicion financiero, ta aparece resistencia y exigencia di mas investigacion.
Nos no por sigui pidi pasenshi di e trahadornan y pensionadonan mientras cu costo di bida ta sigui subi sin limite.
Den e dianan aki tin hopi discusion y speculacion tocante e aumento di salario minimo y pensioen di nos grandinan. Mientras cu Gobierno ta considera medida pa mehora e situacion financiero di e sector mas vulnerable di nos sociedad, tin sector di comercio cu ta expresa su desacuerdo y ta pidi prome un investigacion mas profundo di e situacion economico di Aruba.
OPPA ta respeta e derecho di cada sector pa expresa su preocupacion. Sin embargo, nos ta kere cu tin algun pregunta fundamental cu nos no por sigui evita: Ki investigacion mas nos mester pa compronde cu bida na Aruba a bira extremadamente caro?
Nos trahadornan cu ta cobra salario minimo tin añanan luchando pa yega fin di luna. Nan ta traha, nan ta contribui na economia di nos pais, pero hopi biaha nan salario no ta suficiente pa cubri nan necesidadnan basico: cuminda, huur, awa, coriente, transporte y gasto di nan famia.
Y mientras cu esaki ta sosode, nos pensionadonan, despues di dedica un gran parti di nan bida na servicio di nos pais, ta haya nan mes confronta cu e mesun realidad: un pension cu no ta sigui e ritmo di costo di bida.
Laga nos mira e realidad di cerca: segun e ehempel cu ta wordo menciona den e discusion actual, e Ref Par di un camber di hotel cu anteriormente tabata $150 pa anochi, awor por costa $400. Esaki ta mustra e presion di prijs cu nos economia ta experimentando. Y nos por menciona cuminda, huur, transporte, servicio medico y tur otro necesidad diario.
Ora prijs ta subi, nos grandinan y nos trahadornan no ta haya un opcion pa para di biba. Nan mester sigui paga!
Nos no ta bisa cu e comerciantenan no tin reto. Claro cu nan tin. Un empresa mester por cubri su gastonan, mantene empleo y sigui opera.
Pero, e pregunta ta: Ken ta preocupa pa e trahadornan cu no por yega fin di luna? Ken ta defende e pensionadonan cu despues di 30 of 40 aña di servicio no por biba dignamente cu nan pensioen?
OPPA no ta ignora e necesidad di investigacion economico. Pero investigacion no por bira un instrumento pa pospone indefinidamente e mehoracion di condicion di bida di e trahadornan y pensionadonan.
Kamer van Koophandel a cuestiona e propuesta, entre otro, pasobra e calculo di bestaansminimum ta basa riba datonan di 2006 y 2010.
E AFBA (Aruba Food & Beverage Association) tambe a expresa preocupacion tocante e impacto financiero riba empresa. Esakinan ta preocupacionnan cu merece atencion, pero e necesidad di un ingreso digno merece mesun seriedad.
OPPA ta kere cu e solucion no ta pone e trahadornan y pensionadonan dilanti di comerciantenan como si nan interesnan ta opuesto. E solucion ta busca un balansa husto, cu responsabilidad comparti.
Nos ta pidi Gobierno pa:
- No pospone e proceso di mehoracion di salario minimo y pension sin un calendario concreto y publico.
- Garantisa cu e salario minimo ta acerca na un nivel cu realmente por cubri e necesidadnan basico di un hende.
- Tuma medida pa proteha e pensionadonan contra perdida di poder di compra.
- Investiga e impacto economico y, na mes momento, prepara medida di compensacion pa e empresanan chikito cu realmente tin dificultad.
- Sinta na mesa cu sindicato, sector empresarial y organisacionnan cu ta representa pensionado, incluyendo OPPA.
-Mensahe final
Nos pensionadonan no ta pidi limosna. Nan ta pidi respet pa e añanan cu nan a dedica na Aruba.
Nos trahadornan no ta pidi un regalo. Nan ta pidi un salario cu ta permiti nan biba cu dignidad despues di un dia di trabou honesto.
No por ta bon pa un economia solamente ora empresanan ta genera ganashi.
Un economia ta mester ta bon tambe pa e hende cu ta traha, pa e famianan cu ta lucha pa sobrebibi y pa e grandinan cu a contribui na construccion di e pais aki.
Basta di midi prosperidad di Aruba solamente den cantidad di turista, hotel nobo y entrada di divisa. Mester cuminsa midi prosperidad tambe den calidad di bida di nos propio pueblo!
Un pais cu ta crece economicamente, pero cu su trahadornan y e pensionadonan no por cubri nan necesidadnan basico, mester puntra su mes si e crecemento aki ta yega na tur su habitantenan.
OPPA lo sigui defende e derechonan y e dignidad di nos pensionadonan. Y nos ta expresa nos solidaridad cu tur trahador cu ta lucha pa un salario digno. Nos merece un bida digno – no mañan, pero awor!
