Errol de Freitas:
- San Nicolas tin mester di accionnan concreto
ORANJESTAD (AAN): Segun presidente di SNBA, señor Errol de Freitas, no ta facil pa haya cita cu ministernan di Gobierno pa cua motibo tambe San Nicolas Business Association (SNBA) ta spera cu Gobierno lo ta presente na e di tres cumbre. E encuentro ta ofrece un oportunidad pa dialoga directamente cu e personanan y instancianan encarga cu decisionnan esencial pa e desaroyo di San Nicolas.
E cumbre lo tuma luga diahuebs, 5 di November 2026, di 9:00 di mainta te 2:00 di merdia, na Santa Theresita Convention Center na San Nicolas. SNBA a invita Gobierno, Parlamento y e departamentonan di Gobierno relevante, hunto cu representantenan di sector bancario, abogacia, gremionan, otro stakeholdernan y e Senioren Convent di SNBA. Tambe ta spera presencia di inversionistanan local y internacional.
Segun presidente di SNBA, señor Errol de Freitas, na San Nicolas tin hopi desaroyonan positivo ta tuma luga danki na e esfuersonan di sector priva y e iniciativanan di e asociacion. Miembrecia ta creciendo, negoshinan nobo ta habri y tin inversionistanan interesa pa participa den proyectonan pa e area.
Sinembargo, el a enfatisa cu pa sigui avansa, ta necesario pa distingui claramente entre e responsabilidad di e gremio y esun di Gobierno. Mientras SNBA ta traha riba un plan guia, of blueprint, pa duna direccion na e desaroyo di San Nicolas, Gobierno tin un papel esencial den e proceso di otorgamento di permiso y e mehoracion di infrastructura.
De Freitas a indica cu e dificultad pa logra cita cu ministernan ta limita e oportunidadnan pa presenta e vision, discuti proposicionnan y sigui cu asuntonan pendiente. Den e sentido aki, e cumbre ta un oportunidad importante pa Gobierno scucha directamente di e gremio y inversionistanan, y contribui na pasonan concreto pa e ciudad.
SNBA ta spera cu Gobierno lo brasa e iniciativa y duna acto di presencia cu e compromiso pa contribui na e desaroyo di San Nicolas. Segun De Freitas, e ciudad tin mester di mas cu momentonan pa saca potret: tin mester di accionnan concreto, manera mehoracion di trottoir, iluminacion y colocacion di klinkers, mescos cu den otro districtonan.
“Nos tin pa cuminsa trata San Nicolas y dun’e loke e merece tambe”, De Freitas a enfatisa den un entrevista recien cu DIARIO.
