Indra Zaandam ta logra su diploma di Meester in de Rechten

Aruba ta conoce un hurista nobo mas:

ORANJESTAD (AAN):   Diaranson ultimo Parlamentario Evelyn Wever-Croes hunto cu Parlamentario Xiomara Maduro tabata na Universidad di Aruba na unda señora Indra Zaandam a defende su tesis pa asina gradua como Meester in de Rechten. E tesis di señora Zaandam tabata riba e posicionnan y relacionnan den Reino y con pa fortifica e posicion di e paisnan Aruba, Corsou y Sint Maarten den e relacion di Reino.

            Den su tesis, señora Zaandam a bin cu hopi proposicion y recomendacion con por cambia reglamento di ordo di Rijksministerraad pa asina duna pais manera Aruba mas voz y mas derecho. Cu esaki Aruba por yega na un relacion mas igual basa riba respet na unda puntonan importante y necesario pa Aruba por wordo atendi na un miho manera.

            Parlamentario Wever-Croes a indica cu e tema aki ta uno hopi complica, mirando cu no tin hopi literatura riba dj’e, pero cu señora Zaandam a haci un tremendo trabou riba esaki. Señora Zaandam a traha tambe hopi cerca di relacionnan di Reino den pasado cu sigur a yuda hopi cu awe e por a logra un 8 pa su tesis y pa su manera di defende loke el a presenta.

            “E tabata un honor pami y pa colega Xiomara di por tabata presente y scucha con señora Zaandam a defende su tesis. E ta un persona cu hopi conocemento y nos ta super orguyoso di por tabata parti di e logro grandi aki di dje. Den Gabinete Wever-Croes I y II, Indra a hunga un papel hopi importante ora ta trata di relacionnan cu Reino y awe tur e conocemento aki ta concretisa den un diploma di Meester in de Rechten. Mi kier a felicita Indra cu su gran logro y ta desea su persona hopi exito den su carera profesional” Parlamentario Wever-Croes a expresa.