Parlamentario Heera Dijk di D’66 ta haya importante pa mehora bienestar di pueblo

E ta comparti vision di Prome Minsiter Mike Eman

ORANJESTAD (AAN): E parlamentario di D66, Heera Dijk, a enfatisa e importancia di un bestaansminimum pa Aruba, señalando cu e habitantenan mester tin suficiente medio financiero pa cubri nan necesidadnan basico y participa plenamente den sociedad. Dijk a haci e declaracion aki despues di un reunion entre Prome Minister Mike Eman y su delegacion cu e Comision Fiho pa Relacionnan den Reino (Vaste Commissie voor Koninkrijksrelaties) di Tweede Kamer na Den Haag. Prome Minister Eman tabata acompaña pa Minister Plenipotenciario di Aruba na Hulanda, Mildred Schwengle, y Minister di Turismo, Transporte y Labor, Wendrick Cicilia.

   Na salida di e reunion, Dijk a describi e combersacion cu Prome Minister Eman como habri y cordial, den cual e importancia di sociaal minimum y cooperacion entre e paisnan di Reino tabata central. "Esaki tabata atrobe un combersacion bunita y habri," Dijk a declara, destacando e mensahe di Eman tocante cooperacion y reconocemento di e balor di cada pais den Reino. Segun e parlamentario di D66, aunke Aruba ta un pais autonomo, ta fundamental cu su habitantenan tin e oportunidad pa participa plenamente den sociedad.

   El a splica cu ora un persona no por paga su cuminda of educacion, esaki por crea un atraso social cu ta dificil pa supera. Pa e motibo aki, e ta considera importante pa mehora e nivel di existencia di e poblacion. "Pero naturalmente nos ta tene cuenta cu tur habitante di nos Reino," Dijk a declara, enfatisando cu e bienestar di nos habitantenan mester haya atencion den henter Reino Hulandes.

Heera Dijk ta miembro di Tweede Kamer pa D66 for di november 2025 y ta encarga cu Relacionnan den Reino y Cultura den su fraccion. Anteriormente e tabata miembro di Gemeenteraad di Delft y docente na Haagse Hogeschool.

   Na Aruba, Prome Minister Mike Eman ta impulsa un aumento gradual di salario minimo pa acerca e na e nivel di existencia minimo. Gobierno ta buscando un balansa entre e necesidad di trece mehora den poder di compra di nos trahadornan y e preocupacionnan di sector comercial, mientras ta pendiente di un dialogo social tocante e propuesta lo por continua pronto.