Inauguracion oficial di e ruta directo nobo di Wingo entre Barranquilla y Aruba

ORANJESTAD(AAN):  Aruba a marca un otro paso importante den e fortalecemento di su conectividad regional cu e inauguracion oficial di e ruta directo nobo di Wingo entre Barranquilla y Aruba.

Durante e celebracion na Aeropuerto Internacional Reina Beatrix, tambe a reconoce e lansamento reciente di e ruta entre Bucaramanga y Aruba, ampliando ainda mas e acceso entre Aruba y Colombia.

E ceremonia a reuni Minister Wendrick Cicilia , representantenan di Wingo, ehecutivonan di Aruba Airport Authority (AAA), Aruba Tourism Authority (A.T.A.) y diferente stakeholder den e industria di turismo pa celebra e logro importante aki den expansion di e conectividad aereo di Aruba.

Minister di Turismo, Transporte y Labor, mr. Wendrick Cicilia, a destaca cu e rutanan nobo aki ta resultado di un vision cla pa diversifica nos mercado, fortalece conectividad y crea oportunidadnan nobo pa pueblo di Aruba.

“Cada ruta nobo cu nos logra atrae ta habri porta pa mas oportunidad. E conexionnan cu Barranquilla y Bucaramanga no solamente ta impulsa turismo, pero tambe ta facilita comercio, inversion, cuido medico, reunificacion familiar y intercambio cultural. Nos ta sigui traha pa un Aruba mas conecta, competitivo y cu mas oportunidad pa nos comunidad,” asina Minister Cicilia a duna di conoce.

Cu e adkisicion di Barranquilla y Bucaramanga, Wingo awo ta conecta Aruba directamente cu cinco ciudad importante na Colombia, fortaleciendo e relacion historico entre tur dos paisnan y apoyando e strategia di Aruba pa sigui diversifica su mercado turistico.

E resultado di e prome vuelo ta confirma e potencial fuerte di e ruta nobo aki. E vuelo inaugural for di Barranquilla a yega na Aruba cu un ocupacion di mas cu 90%, mientras cu e vuelo di regreso ta sali cu un ocupacion di 98%, reflehando e demanda fuerte pa conectividad entre tur dos destinacion. Cu e logro di Barranquilla, Wingo awo ta conecta Aruba directamente cu cinco ciudad na Colombia, fortaleciendo ainda mas e relacion entre tur dos pais y ampliando e oportunidadnan pa turismo, reunion familiar, cuido medico y intercambio comercial.

Minister Cicilia a expresa su gratitud na Aruba Airport Authority, Aruba Tourism Authority, Wingo y tur e partnernan cu a haci e expansion aki posibel.

“E conexionnan nobo aki ta mas cu simplemente vuelonan; nan ta representa inversion den futuro di Aruba. Ora nos habri porta pa mas conectividad, nos ta habri porta pa crecemento economico, colaboracion regional y oportunidadnan nobo pa nos pueblo. Cu e mesun determinacion, nos lo sigui traha pa posiciona Aruba como un destinacion fuerte, accesibel y conecta cu e region y cu mundo”, Minister Cicilia a finalisa bisando.