Barbara Brown di AAA:
ORANJESTAD (AAN): Durante un ceremonia special pa marca e prome buelo directo entre Barranquilla y Aruba, Aruba Airport Authority (AAA) a celebra oficialmente e expansion di Wingo cu dos ruta nobo cu ta conecta Aruba directamente cu Bucaramanga y Barranquilla.
Durante su discurso, Chief Revenue Development and Communications Officer di Aruba Airport Authority, Barbara Brown, a destaca cu e inauguracion di e rutanan nobo ta representa hopi mas cu simplemente amplia e mapa di destinonan. Segun Brown, cada buelo nobo ta crea oportunidadnan pa acerca pueblo, fortalece relacionnan comercial, stimula turismo y amplia intercambio cultural entre Aruba y Colombia.
Brown a señala cu Colombia a bira un di e mercadonan emisor di turismo di mas importancia pa Aruba den e ultimo añanan. Den e desaroyo ey, Wingo a hunga un rol fundamental door di amplia constantemente su red di destinonan y haci bishita entre e dos paisnan mas accesibel tanto pa bishitantenan di placer como pa bishahantenan di negoshi.
Cu e adicion di Bucaramanga y Barranquilla, Wingo awo ta conecta Aruba directamente cu cinco ciudad Colombiano: Bogotá, Medellín, Cali, Bucaramanga y Barranquilla. E expansion aki ta agrega cuatro frecuencia semanal adicional y cerca di 9.400 asiento extra durante temporada di aki, reforsando ainda mas e conexion entre ambos paisnan.
Segun Brown, e resultadonan ta refleha confiansa den Aruba como destino turistico, confiansa den e potencial di e rutanan nobo y, riba tur cos, confiansa den e aliansa cu a wordo construe entre Aruba Airport Authority y Wingo.
El a enfatisa cu e exito di e operacionnan no tabata posibel sin un colaboracion estrecho entre e aerolinea y aeropuerto. Ademas di coordina e operacionnan, ambos organisacion a traha hunto den campañanan di mercadeo y promocion pa aumenta demanda tanto na Colombia como na Aruba.
Como muestra di aprecio, Aruba Airport Authority, cu apoyo di Gobierno di Aruba, a presenta Wingo cu un reconocimiento especial: un escultura representando dos man cu ta uni. Brown a explica cu e obsekio ta simbolisa confiansa, colaboracion, apoyo mutuo y e compromiso comparti cu a permiti e aliansa crece a traves di e añanan.
Barbara Brown a conclui felicitando henter e familia di Wingo pa e expansion di su operacionnan y a expresa confiansa cu ambos socio lo sigui traha hunto pa fortalece conectividad, crea oportunidadnan nobo y sigui skirbi un historia di crecimiento comparti entre Aruba y Colombia.
