ORANJESTAD (AAN): Pa di tres aña consecutivo, N.V. ELMAR y WEB Aruba N.V. ta anuncia lansamento di e campaña anual Temporada di Calor.
E campaña aki ta tuma luga durante e lunanan di mas calor di aña, for di juni te cu final di september, cu enfoke riba conscientisacion, preparacion y seguridad di comunidad durante temporada di temperatura halto.
Durante Temporada di Calor, consumo di awa y coriente por aumenta, mientras cu calor extremo por trece riesgonan pa salud, bienestar y seguridad. P’esey, N.V. ELMAR y WEB Aruba N.V. ta uni forsa pa informa comunidad cu tipnan practico tocante con pa prepara, cuida curpa, mantene cas y famia sigur, y uza awa y energia di forma consciente.
E campaña ta comparti informacion educativo y facil pa aplica, incluyendo conseho pa keda hidrata, evita exposicion prolonga na solo, tene cas fresco, proteha personanan vulnerabel y ta consciente di consumo di awa y coriente durante e lunanan di mas calor.
Como parti di e campaña, comunidad por bishita www.temporadadicalor.com pa mas informacion, video y tipnan practico pa prepara miho durante Temporada di Calor.
Cu e iniciativa aki, N.V. ELMAR y WEB Aruba N.V. ta sigui reafirma nan compromiso pa informa y apoya comunidad, promoviendo un Aruba mas consciente, prepara y sigur durante temporada di calor.
Prepara bo mes. Cuida bo curpa. Sea consciente di bo consumo.
