ImSan ta hopi importante pa Ministerio di Salud den cuadro di e maneho cu kier wordo hiba

Minister Dangui Oduber a reuni cu director di ImSan -  *Lo busca mas dokter di wowo pa reduci e wachtlijst

ORANJESTAD (AAN) – Durante e combersacion aki minister Oduber a comparti e vision cu e kier mira den Salud Publico na Aruba. A splica e director di ImSan riba e maneho cu kier wordo hiba riba mehoracion di e calidad di cuido, mehoracion di servicio y baha e tempo di espera na pa specialistanan.           Lo bay percura pa busca mas specialista y lo bay inverti y ehecuta e programa nacional di prevencion, tambe lo bay enfoca riba hiba un bida mas saludabel.

            ImSan ta hopi importante pa ministerio di salud den cuadro di e maneho cu kier wordo hiba. Durante e periodo di gobernacion di Gabinete Wever Croes 1, minister Oduber a brinda tur cooperacion necesario pa haci e inversionnan cu tabata tin mester pa por finalisa e proyecto di radioterapia y tambe percura pa ImSan haya 22 cama cu por wordo usa pa 'short stay hospital'.

            Pa e proximo periodo minister Oduber ta comprometi pa continua e inversionnan y busca un PET CT scan pa ImSan. Di e forma aki lo cuminsa percura pa haci turismo medico na ImSan. Tambe lo busca mas dokter di wowo pa reduci e wachtlijst.

            Loke ta hopi importante tambe pa den e periodo di gobernacion aki wordo cristaliza ta e JCI accreditation pa Imsan. Tur e añanan cu a transcuri ImSan ta trahando hopi duro pa logra esaki y pa e periodo aki e lo ser logra.

            E JCI accreditation aki lo habri posibilidadnan pa ImSan pa por sigui crece.

            Minister Dangui Oduber por mira bek un bon reunion y sigur ta conta cu tur cooperacion di ImSan pa percura pa e maneho di mehoracion di cuido, calidad y servicio wordo ehecuta.