Cu su tapaboca di ‘Scouting Aruba’ bisti...ORANJESTAD (AAN); Na numeroso ocasion ora cu e ingeniero di NASA, esta Dr. Edward Cheung ta di bishita na Aruba,
e sa haci bishita regular na diferente scol y organizacion, pa asina duna informacion amplio riba diferente tereno, pa asina trata na crea interes den ciencia cerca alumnonan di Aruba.
Un di esnan cu el a bishita poco tempo pasa tabata Grupo Scout Ora Ubao, unda nan a regal’e un bunita tapaboca cu e emblema di Scouting Aruba riba dje.
E siman aki, Dr. Cheung ta na estado di Arizona, unda e ta na e fabrica di Satelite. E biaha aki, Dr. Cheung a keda encarga pa representa NASA na e lugar aki, pa supervisa e construccion di e aparato.
Ta trata aki di construccion di e satelite JPSS-2, cu ta un Satelite pa Observa Tempo, pues un ‘Weather Satellite’. E lo no ta djis pa un region specifico, sino pa vigila weather di mundo completo.
Dr. Cheung ta splica cu tempo y clima ta cambiando y ta afectando tur hende, specialmente un isla chikito di Aruba.
Y ora cu e ta na e fabrica na Arizona, por mira riba e potret aki cu Dr. Cheung ta usando e tapaboca di Scouting Aruba, como un sorto di homenahe na tur esnan den mundo di scouting na Aruba.
Scouting ta un organizacion cu ta traha cu lidernan boluntario, y awe ta orguyoso pa mira nan emblema den un lugar importante y steril pa construccion di un Satelite cu ta bay yuda cientificonan observa mas di cerca e cambio climatico cu ta andando.
