Produccion energia solar ta posibilidad grandi pa futuro Aruba - *Planificacion energia ta bira central den comunidad di futuro
ORANJESTAD (AAN) — Uno di e cambionan grandi cu clima a conoce, sigur ta wordo experencia na Aruba, caminda calor ta uno di e topiconan principal.
Calor na su turno ta nifica un aumento importante di uzo di coriente, na cual hende a costumbra y cu a bira base pa construccion di vivienda y companianan cu ta tene economia na bida.
Planificacion di energia ta central den e comunidad di futuro si tene na consideracion e estilonan di bida cu hende a asumi a base di e progreso cu un gran parti di mundo a conoce durante Siglo 20.
“Viviendanan a cambia. Sitionan di trabou a conoce cambio. Den pasado negoshinan tabata habri nan porta y bentananan. Hasta na oficinanan hende tabata traha cu bentana habri,” a wordo treci dilanti dor di informantenan.
Uno di e asuntonan cu informantenan ta haya sumamente importante pa wordo discuti dor di tur gremio na e momentonan aki, ta e forma cu clima lo afecta comunidad pero tambe bida empresarial cu lo conoce aumento di gasto.
A wordo mustra na DIARIO, cu a consumo di coriente ta subi mundialmente. Aunke coriente riba su mes ta birando e combustibel di futuro, debi sigur na e confrontacion entre hende y cambio di clima, coriente mester di otro combustibel pa e wordo produci mientras ainda un pais no a wordo adapta na e forma di recicla coriente of na formanan alternativo pa produci coriente.
Mas y mas den e produccion di awa y coriente, hende ta scoge pa gas debi na e hecho cu gas ta mas limpi cu petroleo.
Na 2020 bista di hende tabata directamente fiha riba e pandemia ocasiona pa Covid-19.
Na 2021, comercio a reactiva y a pesar di e hecho cu ainda hende no a domina e pandemia, mundo ta bolbe na mas actividad economico den cual produccion di coriente ta hunga un prijs importante.
Informantenan a indica na DIARIO, cu por spera un aumento importante di uzo di electricidad despues di e pandemia na Aruba mientras turismo lo recupera y e aumento di activicdad economico ta den planificacion.
Segun informantenan planificacion di energia ta hunga un papel central den planificacion di comunidadnan cu a base di Covid-19 mester constui basenan nobo, den cual cambio di clima sigur lo hunga un papel importante.
A mustra aki riba gestionannan cu ta wordo haci rond mundo pa aumenta e produccion di energia alternativa.
Den esaki e companianan productor di energia, mester cuminsa haci mas uzo di produccion di energia alternativo, den cual uzo di energia solar ta hunga un papel importante.
Na e momentonan aki uzo di energia solar, no tin atencion cu e mester tin den tur sector, manera ta e caso na hopi pais.
A wordo mustra cu mundo ta drenta un futuro nobo, den cual e produccion di coriente ta haya tur atencion debi na e cambionan di clima cu ta avansa rapidamente.
Energia solar pa Aruba ta hunga un papel importante y no mester ta solamente topico di gobierno y di compania di produccion di energia so, manera informantenan a trece dilanti.
Proyectonan grandi por cuminsa adapta nan mes na produccion di energia alternativa, cu mester bira un topico mas importante den comunidad na inicio di un era mundial nobo.
Den construccion di vivienda y di edificionan nobo e tema aki mester hunga un papel importante tambe segun informantenan.
DIARIO lo sigui amplia riba e tema aki.
