Importante pa publico haya sa di exigencia ora di keur vehiculonan offroad

DTI cu detaye encuanto UTV y ATV

ORANJESTAD (AAN): Siman a start sali cu informacion balioso ofreci door di DTI, kende kier duna informacion na pueblo encuanto e procedimento pa keur vehiculonan di motor.

   E vehiculonan di motor cu nos ta yama UTV ta worde categorisa conforme nos ley actual como un motorvoertuig (auto) y un ATV ta worde categorisa como brommer.

    DTI ta haci su keuring a base di e requisitonan cu tin den ‘Landsbesluit Voorschriften Voertuigen’ (AB 1999 no. 61,).  Pa loke ta un UTV esaki ta nifica cu ta mesun requisitonan cu ta ser exigi di un auto.  Pa loke ta e parti di seguridad ta importante y esencial pa e vehiculo ta cumpli cu e requisitonan.

   Dirigentenan di DTI ta haci e suplica na tur e compania cu ta verhuur UTV/ATV pa percura pa nan vehiculo ta gekeurd y tur otro documentonan ta na ordo.

   Companianan cu lo desea di keur nan vehiculonan por tuma contacto cu sr. Francis Quandt, Chef di Voertuigkeuring  na Tel: 593-7947 pa por schedule e cita y pa mas informacion.

   E ta hopi importante pa keur bo vehiculo di motor, pa motibo cu esaki ta un chekeo pa cu e condición di e vehiculo y ta hisa e seguridad di e usuario cu por ta bo mes, di bo famia, bo trahador of un turista cu ta di bishita na Aruba.

DTI ta sugeri pa keur e vehiculonan pa evita desgracianan innecesario, evita boetnan of gastonan halto .

   Pa un UTV pasa un keuring e tin di cumpli cu e siguiente lista di requisitonan:

(1). E datonan di e registracion ta worde verifica:

(1a). E “Vehicle Indentification Number” (VIN).

(1b). E tipo di vehiculo y e tipo di motor (Si e tipo di motor di e vehiculo no ta cuadra  (p.e. ta indica gasoline pero ta diesel) ta exigi pa haci cambio na DIMP prome cu otorga e keuringsbewijs)

(1c). Color di e vehiculo.

    Ta controla si tin un seguro valido. Si no tin un seguro valido no ta otorga e keuringsbewijs.

(2). Requisitonan cu un UTV mester tin pa por pasa un keuring:

Mester tin Brake dilanti, patras y handrem

Spiel rechts, links y memey paden

Mechanismo di stuur y shocks mester ta den bon condicion

Tairanan mester tin groef (min. 1 mm.).

Muffler y escape di gas no mag tin buraconan aden y no mag di produci hopi huma

Mester tin luz dilanti y patras(cora), luznan di color no ta worde acepta.

Mester tin luz di reverse.

Mester tin luznan di señal dilanti y patras (oranje).

Mester tin luznan di brake.

Mester tin number di auto dilanti y patras y mester tin un kentekenlicht

Mester tin pitro, y mester ta un solo tono.

Mester tin draagveren.

Vehiculo mester ta den bon condicion general.

Batería mester ta bon ancra.

No por tin liek di azeta.

Vehiculo mester ta dentro di e siguiente midinan (4,20 m. halto - 2,60 m. hancho).

Safety belt mester ta den bon condicion.

Sientanan mester ta bon ancra.

   Keuring ta tuma lugar conforme requisitonan di Landsbesluit voorschriften voertuigen (AB 1999 nr. 61). Por haci un peticion na DTI pa ricibi e requisitonan di UTV conforme e ley, na email This email address is being protected from spambots. You need JavaScript enabled to view it..