Iniciativa di Campaña Nacional Limpi Limpi ta pa stimula habitonan di separacion

Minister Ursell Arends:

ORANJESTAD (AAN):  Dialuna atardi 18 di december durante conferencia di prensa, Minister Arends encarga cu maneho di desperdicio, a anuncia cu lo continua cu e iniciativa di Baki den Bario.

            Na augustus di e aña aki a comunica cu lo tin un parke di separacion den diferente districto, pa cuater luna. E districtonan selecta tabata San Nicolas, Santa Cruz, Noord, Oranjestad, Savaneta, Pos Chikito y Paradera. E fechanan di e 12 eventonan di 2023 ta disponibel riba e website limpi.aw .

            Durante henter e proceso a bin ta evalua y adapta e actividad basa riba sugerencianan, e tereno disponibel y demas logistica. Na comienso a cuminsa ta acepta cinco diferente tipo di desperdicio cual tabata desperdicio di mata (greenwaste), metal, e-waste, construccion y desperdicio mescla (bulkwaste). A expande e separacion cu tres tipo di desperdicio adicional cual tabata carton, taira y azeta di cushina.

            Baki den Bario a bin ta ricibi alrededor di 500 auto y rotacion di mas cu 60 baki pa cada actividad. Palabra di danki ta bai na tur partners cu a forma parti di e iniciativa di Baki den Bario y tambe ciudadonan pa e yega na e parke di separacion y coopera den e proceso. 

            Aruba su compromiso pa separa desperdicio den gran escala ta contribui grandemente na preservacion di Aruba su naturalesa. Separando na Baki den Bario ta permiti procesonan eficiente di reciclahe, reduciendo e presion riba nos tera pa atende cu Aruba su desperdicio en general.

            Minister Arends a duna di conoce cu lo comunica e schedule pa 2024 den januari pero ya caba ta sigur cu Baki den Bario lo tuma luga un biaha pa luna. Tambe e minister a informa cu e ta premira tres compania mas cu lo drenta e industria di procesa desperdicio. Lo evalua pa añadi esakinan den e actividadnan di Baki den Bario unda ta habri e posibilidad pa expande mas ainda e desperdicionan acepta. Asina por procesa e desperdicio na un manera mas responsabel. Mas nos separa, mas material prima nos por recupera pa reuza of recicla.

            Gobierno tin e responsabilidad pa facilita y tambe educa pueblo riba separacion, mientras cu e infrastructura pa reciclahe ta wordo optimalisa. Cada paso individual of di iniciativa propio di cada compania/organisacion ta fundamental pa dirigi nos den un direccion mas sostenibel. Hunto nos por mantene nos Aruba Limpi Limpi.