Fundacion Promove Cultura:
ORANJESTAD (AAN) -- Diahuebs 28 di December lo tuma lugar e Festival di Dande infantil y hubenil, na Centro di Bario Tanki Leendert, y e aña aki e ta cumpli su di 23 edicion. E lo wordo organiza pa Comision Promove Cultura.
Te awo tin 10 cantante y nuebe agrupacion cu ta bay acompaña e participantenan infantil y hubenil. E inscripcion lo cera diabierna 22 di December, y alavez tiramento di lot lo tuma lugar. Mas informacion lo word duna na pueblo ora tin tur cos concretiza despues di tiramento di lot. E festival lo cuminza pa 6.30 atardi pa termina pa 10.30 anochi.
Tin cuater categoria di edad: 4-6 aña, 7-9 aña, 10-12 aña, 13-17 aña. Lo saca un ganador, sea rey of reina di Dande, den cada categoria y dependiendo di e participacion lo bin cu di dos y di tres lugar.
Comision Promove Cultura ta hopi contento cu Festival di Dande tey pa sigui inculca cultura tipico den nos muchanan. Nan ta gradici e sponsornan y ta invita pueblo en general pa presencia e Festival infantil y hubenil di Dande den Centro di Bario Tanki Leendert.
