ORANJESTAD (AAN): Oficina Central di Estadistica (CBS) ta anuncia e publicacion di e prome parti di e Atlas Social di Aruba
cu a wordo traha a base di datonan colecta durante di Censo 2020. E mapanan aki ta ilustra e diversidad social y demografico na Aruba y ta forma parti di un serie di publicacion nan cu lo wordo haci disponibel den un formato digital.
E mapanan ta ilustra visualmente e indicadornan di distribucion social, economico y demografico di pais Aruba. Hasiendo uzo di tecnologianan nobo, pa prome biaha e Atlas Social ta disponibel den e formato digital y interactivo.
E datonan ta wordo presenta como un storia y ta duna e usuario e oportunidad pa scohe e mapa cu e kier bishita di e lista di mapa cu ta parece na comienso di e Atlas Social. Na cada mapa por lesa un descripcion cortico cu ta consisti di un texto corto y un grafico. Usuarionan por scohe tambe pa download e tabelnan y graficonan cu ta pertenece na cada mapa.
E prome mapanan cu CBS ta presenta ta e mapanan di Poblacion cu ta trata e caracteristicanan general di nos poblacion manera:
- Poblacion total
- Hogarnan total
- E densidad di e poblacion di Aruba(cantidad di persona pa km2).
- E indice di sexo (e porcion di hende homber y muher den nos poblacion)
- E edad mediano (e edad cu ta pertenece na 50% di e poblacion)
- E indice di dependencia (e porcion di persona mayor di 64 aña y menor di 14 aña cu ta depende di e poblacion economicamente activo (esnan cu ta den e edad di 14-64 aña)
- Porcentahe di nos poblacion cu tin 65 aña of mas
- Porcentahe di nos poblacion cu ta menor di 14 aña
E mapanan di Aruba ta wordo dividi den 55 zona y 8 region. Si un usuario kier haya mas informacion di un region of zona, e por click riba esaki y un “pop-up window” lo habri cu informacion tocante e zona of region scogi pa aña 2010 y 2020.
Aruba ta un isla chikito cu un superficie total di 180 km2 y cu un poblacion cu tabata consisti di 108,166 persona na 1 di october 2020 (durante e conteo di Censo 2020). E mapanan ta mustra cu aunke Aruba ta un isla chikito den tamaño, tin diferencia entre zonanan y regionnan pa locual ta trata caracteristicanan social y demografico di e poblacion. Pa un planificacion regional efectivo y optimal ta importante pa por indica yilustra e caracteristicanan di cada zona y cada region.
E link pa e Atlas Social ta:
https://storymaps.arcgis.com/stories/0f88c5a5462e4a37906fdae232490de4
E mapanan ta disponibel riba nos website www.cbs.aw y por wordo haya bou di e tab di ‘Census2020’.
CBS ta purba di publica datonan pa e poblacion den un manera mas atractivo pa lesa y compronde. CBS ta spera cu e publicacion aki lo yuda esnan encarga cu planificacion regional cu nan trabou y tambe provee e publico en general cu un mihor comprendemento di e desaroyonan regional na Aruba.
