Imagen net ora cu Airbus A320 di jetBlue ta aterizando cu background di huma diki

ORANJESTAD (AAN): Diamars merdia debi na e cambio di biento, Aeropuerto di Aruba

a haci cambio tambe na e pista di aterizahe cu nan tabata usa, for di e pista normal di Runway 11 pa esun Runway 29, cu ta pone avionnan baha for di pariba, pues direccion contrario.

   Semper ta bon pa ora avionnan sea subi of baha, nan haci esaki contra e direccion di e biento cu ta supla.

   Riba Diamars, esaki a pone cu avionnan tabata haci nan final aproach for di riba e isla, y sigui riba un glide-scope cu ta pone nan baha direccion west.  Esaki ta pone nan pasa hopi abao mes, net un tiki panort di e huma diki aki riba Barcadera.  Turistanan pues sinta na banda robez di e avion, lo a haya un bista espectacular di e candela.

   Uno di nan tabata un Airbus A320-200 di jetBlue cu tabata yegando Aruba procedente di Fort Lauderdale.

   Pariba di Aruba el a dal un birada pa direccion 290º, cu ta un tiki West-Noordwest, y a keda bula te cu el a baha.

   E potret aki pa cortesia di Lilian Kock, ta mustra net ora e avion ta na apenas 300 pia di altura pasando riba bario di Mahuma.  Su tras por mira e huma diki di e candela na Daltra ta decorando e cielo su tras.