Iluminacion nobo pa apertura di Futbol Division di Honor

ORANJESTAD (AAN): Manera ta conoci, awe Diabierna lo tin e Apertura di Campeonato di Futbol 2021-2022 na Aruba, pa cu Division di Honor.

   Esaki lo tuma lugar den oranan di anochi na Stadion Guillermo Trinidad na Dakota.  Algo cu DIARIO a tuma nota di dje, ta cu tabatin trabaonan ta wordo haci Diahuebs merdia riba e luznan.

   Ta conoci cu iluminacion den Stadion ta malisimo, specialmente e parti mas zuidwest di e veld unda apenas tabatin algun luz funcionando y e tereno ta relativamente mas scur eynan compara cu e resto di tereno.

   E speranza tey cu awor a pone luznan special, kizas mas briyante di LED, cu por yuda spaar placa y ofrece mihor iluminacion.

   Apertura lo ta pa 8:00 pm, y pa e prome wega e team di Bubali lo enfrenta Riverplate.

   Diasabra lo tin wega pa 6:30 pm entre Caravel y Estrella.  Pa 8:30 pm lo tin wega entre SV United y RCA.

   Diadomingo lo tin wega pa 6:00 pm entre Britannia y Nacional.  Pa 8:00 pm lo tin wega entre La Fama vs. Dakota.

   Tur e weganan aki lo ta den Stadion Guillermo Trinidad, y publico lo ta ancioso pa mira con e iluminacion a keda.