CEO Ronella Croes: *Pa December ta pronostica riba 100 mil bishitante
ORANJESTAD (AAN): Diahuebs mainta durante e conferencia di prensa di Crisis Team di Covid-19, CEO di Oficina di Turismo (ATA), Ronella Croes a referi na e ultimo desaroyonan pa loke ta traha turismo.
El a cuminsa bisando cu na e momentonan aki ATA ta proyecta cu lo por ta cerando aña 2021 cu un recuperacion di 73 % di cantidad di bishitante compara cu aña 2019.
E proyeccion aki ta uno optimista ya cu ta riba e scenario inicial optimista cu tabata tin proyecta pa e aña aki, Croes a indica. Esaki ta refleho di 'pushnan' adicional cu ta dunando resultadonan positivo y a bin ta haci esaki.
E perdidanan cu a experencia den e ultimo dos lunanan y cu ta sigui impacta te cu resto di aña tin su peso y ta locual mester purba evita, e ehecutivo di ATA a splica.
El a agrega cu door di e impacto di e variante Delta, na Augustus a perde un total di 15 mil bishitante, compara cu locual a proyecta pa e luna aki.
Na September, e cantidad aki tabata 10 mil bishitante y pa e lunanan di October y November ta proyecta tambe cu lo tin 10 mil bishitante menos di locual inicialmente tabata tin pronostica, a señala.
Pa luna di December, sinembargo, ta proyectando cu lo por ta riba 100 % di recuperacion pa loke ta trata cantidad di bishitantenan, compara cu December 2019. Esaki kiermen tambe cu pa December lo por ta sperando riba 100 mil bishitante, Croes a indica.
{gallery}ATA ta proyecta cerando 2021{/gallery}
