ORANJESTAD (AAN) – Minister di Salud Publico, Dangui Oduber, a duna un update di e situacion di Covid-19 na Aruba, y tambe a referi na e desaroyo di vacunacion.
Minister Oduber a bisa cu gobierno a haya prudente pa actualiza e informacion, pasobra ta varios siman atras cu nan a duna un update di e situacion di Covid-19.
E dignatario a menciona cu e ultimo dos lunanan e situacion a conoce un mehoracion den e cantidad di casonan pa dia, y tambe den e cantidad di personanan cu ta wordo hospitaliza.
Minister Oduber a indica cu gobierno ta satisfecho con e “positivity rate” ta bayendo. Luna di Augustus, e dignatario a comenta, tabata un luna hopi dificil pa pais Aruba ora cu a wordo confronta cu e variante delta unda cu gran cantidad di persona mester a wordo hospitaliza, y hopi persona mester a wordo manda Colombia, na dado momento, door cu no tabata tin mas capacidad na Aruba.
Oduber a bisa cu e dos ultimo lunanan aki si por mira cu e situacion ta mehorando. Actualmente, tin 160 caso activo na Aruba. E ultimo siman tabata tin un average di 12 caso nobo pa dia, y e “positivity rate” ta rond di 8%. Kiermen, e indicacion ta cu e situacion na Aruba ta bayendo hopi mihor, locual ta yuda nos pais den recuperacion di nos turismo y nos economia.
E situacion actual na Hospital ta cu tin tres persona interna den e Departamento di Covid-19, y tres persona den e unidad di cuido intensivo, 19 persona ta interna na Colombia, na e momentonan aki, den ICU; y tambe tin un menor di edad cu Covid, cu tambe ta interna na Hospital.
E dignatario a duna di conoce cu actualmente nan tin diesdos cama di ICU disponible na Aruba. Esaki cu un bon cooperacion di Gobierno di Hulanda, pero e personal aki tambe ta proyecta pa bay for di Aruba, den luna di November, y e ora ey gobierno mester percura pa tin suficiente capacidad di camanan di ICU pa e siguiente lunanan.
Pa loke ta trata e cantidad di pashentnan cu a wordo manda Colombia, e dignatario a menciona cu mayoria di nan no a vacuna. Tin 39 pashent total a wordo manda Colombia caba, algun tabata den unidad di cuido intensivo y a fayece na Colombia.
E dignatario a informa cu di e 39 pashentnan cu a wordo manda na Colombia, 34 no a vacuna. Di e 39 pashentnan aki, lamentablemente 13 a fayece, di cual 12 no a vacuna, y 10 a bolbe Aruba den bon estado di salud, y tin 16 ainda ta luchando na Colombia, pa percura pa nan salud mehora. Tambe 83% di tur esnan cu a wordo interna den HOH, pa motivo di covid-19, no a vacuna, segun Minister Dangui Oduber.
{gallery}Minister di Salud situacion di Covid-19 na Aruba ta mehorando{/gallery}
