Idea nobo pa alumnonan warda nan smartphone durante les

Bon iniciativa di Colegio San Antonio

ORANJESTAD (AAN): Ya ta conoci, cu e uzo di celular of tambe smartphone na scol ta topico di discusion na scolnan riba e isla, den region, na Merca, Europa. Cu otro palabra e ta un topico actual cu hopi institucion ta deal cu ne awendia.

   Aunke tabatin algun scol avanza na Aruba cu mey-mey di decada di 2010 a duna OK pa alumnonan usa nan smartphone durante les pa sigui instruccion, toch en general e pensamento ta cu e smartphone por ta un distraccion pa alumnonan.

   E siman aki a haya sa, cu na Colegio San Antonio MAVO na Santa Cruz, entrante e aña aki a adapta reglanan di scol caminda cu e alumno ta liber pa uza su telefon den pauze of un vrije lesuur, pero durante les ta warda esaki den tas, baki riba mesa of den hoesjes na muraya. E docente ta indica na cua momento e alumno por uza su smartphone, por ehempel ora di uza Kahoot! Pero semper cu un meta educacional.

   Alumno cu na forma scondi dicidi na warda telefon den saco di carson of jacket, por riesga cu ta tuma e telefon den beslag. Y si esaki pasa durante prueba, scol ta considera esaki como un intento di fraude (spiek).

   E scol awor ta den e fase di implementacion y ta compronde cu e ta tuma tempo. Pa hopi alumno e telefon celular a bira manera e di 79 organo importante na su curpa. Pesey docentenan tin hopi pasenshi den e fase aki.

   Colegio San Antonio ta spera cu e cambio den maneho aki duna su fruto. E meta mas importante: e alumno ta mas gefocused den les y por concentra y participa optimalmente.