Presidente di Parlamento Edgard Vrolijk:
ORANJESTAD (AAN) – Presidente di Parlamento, mr. Edgard Vrolijk, despues cu el a relata, den conferencia di prensa, cual ta e debenan financiero cu Aruba tin cu paga, el a expresa cu ta un berguenza si pa bisa cu Aruba tin tanto debe, pasobra esey ta un mal maneho financiero, “pero pa e debe di mas chikito nos ta ser strangula pa e discusion entre LAft, RAft, etc”, Vrolijk a expresa.
Tocante loke ta supervision financiero, el a bisa cu Hulanda ta exigi un Ley di Reino. E Ley di Reino aki, no ta pasobra Aruba ta un mal pagador pasobra e ta pagando casi 6 billion, si wak e periodo eynan y e debe cu Hulanda ta esun mas chikito, Vrolijk a reitera.
“Hulanda cu e supervision aki kier garantiza cu e ta ser paga. Pues den e caso aki, e unico meta di e supervision ta pa e ser paga, cu e ta e prome cu ta ser paga, punto! Cu e ta e prome cu ta cobra!” Presidente di Parlamento, Edgard Vrolijk a reitera.
El a agrega cu na e momento aki nan ta bisa cu si Aruba acepta e Ley di Reino e ta haya e 3.2% na interes. “Si nos no acepte nos ta gestraf'e entre 6 pa 8% y si dicidi pa sigui negocia y yega na un acuerdo, nos lo paga 5.2% mientras cu ta negocia”, Edgard Vrolijk a señala, y a añadi: “Cu nos tin cu paga bek nos ta conciente pero e pregunta ta keda si ta hustifica pa bula di 3 pa 6 di 6 pa 5, pues cu otro palabra, bo ta actuando di mala Fe”, Vrolijk a expresa.
Presidente di Parlamento a bisa cu mundialmente tur hende ta papia di un recuperacion despues di e pandemia, pero Reino Hulandes cu tin hopi wowo riba dje, ta keda oprimi un partner chikito den Reino, cu tin necesidad financiero y ta abusa di dje. “ Kiermen, esey ta locual ta mi pensamento, pero atrobe mi ta bisa un di e hustificacionnan ta bin di 2 pa 3 akinan”, Edgard Vrolijk a señala.
Vrolijk a comenta cu el a scucha gremio, el a scucha dos parlamentario, el a wak carta di gremio cu a keda entrega na Gobernador unda ta pidi pa Parlamento acepta e RAft, cu lo spaar 30 miyon florin, cu e no sa di unda a saca e calculacion aki pasobra ora el a puntra esnan di Finanzas nan a splica cu e ta core den 20 miyon florin. El a bisa cu el a scucha hopi argumento cu ora cu scapa e placa aki, e ta bay na inversion. “Well, nos ta corectamente incorecto. Di con mi ta bisa ‘corectamente incorecto’? Pasobra nan ni un, ni gremio ni e dos parlamentarionan of nan ta di mala fe ta of ta haci, of nan no ta compronde ley. Den e Ley di RAft ta bon ta para bon cla cu tur placa cu scapa na interes abao ta bay pa paga, cual debe? e placa Hulandes: e placa cu nos debe Hulanda” Presidente di Parlamento a señala.
