Icono di Aruba Juniors “Joy Kock” a bay sosega

Miembro di Honor di Aruba Juniors na aña 2012 

No por papia di Aruba Juniors sin corda riba Joy Kock. For di edad hopi hoben Joy a bira miembro di Aruba Juniors como hungado di basketball y futbol. Joy a hunga futbol pa Aruba Juniors den practicamente tur division, for di junioren te reserve hoofdklas. Tambe Joy a hunga basketball pa algun aña. Tanto den B klas como A saliendo campeonnan di basket 4 aña consecutivo. Aña 1954 ta uno memorable pa Joy pa motibo cu Aruba Juniors a logra 5 campeon di futbol y 3 campeon di basketball,esaki den tur klas cu tabatin. Joy a hunga den Junioren y reserve hoofdklas y den A klas di basketball.

Joy su carera como deportista a termina hopi tempran pa motibo cu el a bira un musico profesional y a bai toca na Aruba Caribbean Hotel cu 20 aña di edad.

Ora cu Joy a pensa cu e no lo haci deporte mas, difunto Luis Swaen a aserk’e pa bin hunga softball cu Aruba Juniors Vets. Esey tabata na aña 1990. El a drenta e team como pitcher y infielder hunto cu peloteronan grandi manera Paus y Ro Agunbero. Mas despues Joy ta bira manager di e team di Softball di Aruba Juniors y ta bira un di e dirigentenan mas importante den softball 50 plus. Hunto cu Chico de Kort y Chomon Ras ta lanta e “Federacion Liga Mayor di Softball Arubano”. Joy ta bira e prome presidente di Liga Mayor. Joy tabata e motor y un di e iniciadornan dii e famoso torneo di softball “Himno y Bandera” cual te awe ta wordo organiza.

Otro torneo cu Joy a inicia ta e torneo den memoria di Luis Swaen. Joy tabatin un pasión grandi pa su team di Aruba Juniors  softball 50 plus cu cual el a logra varios titulo di campeón entre nan 4 biaha campeón di Aruba y 3 biaha Torneo Himno y Bandera.

Joy tabata organiza biahenan pa su team midi forsa cu teamnan den exterio. Asina por menciona cu Internacionalmente Joy a fungi como manager y hungador di Aruba Juniors Softball na Sto Domingo, Colombia, Cuba, Corsou, Venezuela y Ecuador entre otro. Joy a dirigi su team na un record di 80% di weganan gana. Joy tabata miembro di  directiva di Aruba Juniors varios biaha. Su ultimo función tabata PR di directiva. 

Joy su filosofia den bida ta cu bo no mester ta un “superstar”, pero un bon “teamplayer”. 

Cu Joy sosega na paz