Resultado eleccion ta exigi refleho den gobernacion di Aruba
*Wendrick Cicilia den salida casi a iguala cantidad di voto Mike
*Reino a base di Statuut ta exigi continuacion di maneho actual
ORANJESTAD (AAN) — E sistema democratico riba cual gobernacion di Aruba ta basa, ta wordo garantiza dor di Statuut di Reino Hulandes, responsabel pa e bienestar di e ciudadanonan Hulandes, cu ta forma comunidad di Aruba.
Aruba como Estado di Derecho mester tene su mes na loke Ley a exigi pa asina garantisa bienestar di e Pueblo di Aruba, cu ta alma di sistema politico cu mester sirbi tur Arubiano.
E resultadonan di eleccion 2024 no por wordo mira solamente como un rechazo di un parti di Pueblo di Aruba di e maneho cu a wordo hiba dor di Gobierno Wever-Croes, cu a bay atras den cantidad di voto a base di medidanan cu e mester a tuma pa asina percura pa Aruba a sobrevivi e maneho cu Gobierno Wever-Croes a hereda.
Ta hustamente na e punto aki mester regresa ya cu den e eleccion tras di lomba algo sumamente importante a socede cu tabata e hecho cu Mike Eman a dicidi di “bolter” e berdad di AVP, cu a bira un partido chikito a base di e maneho di Gobiernonan di Mike Eman cu a destrui Aruba financieramente y a ocasiona e motibo pa cual gobernacion Wever-Croes mester a tuma medidanan financiero pa scapa Aruba y cumpli cu e debernan financiero na cual leynan ta mara gobernacion di un pais.
Ademas di esaki AVP a produci scandalnan importante cu a permiti Pueblo di Aruba di cera conoci directamente cu e abuso politico conoci como “family and friends”.
E maneho di Mike Eman den Gobierno te 2017 tabata e motibo directo cu AVP a perde eleccion na 2017 loke a pone Evelyn Wever-Croes na mando di Aruba cu mester a recupera di e desastre financiero cu Mike Eman a laga atras y a haci cu Mike Eman mester a bay sconde.
Con Mike Eman lo a enfrenta eleccion na 2024, exactamente diez aña despues cu pa su culpa Reino Hulandes a introduci supervision, a bini dilanti na momento di entrega di lista di candidatonan ora supuestamente Mike Eman a “bolter”cos atrobe manera e mes no solamente a admiti pero a uza como su lema di campaña.
Mike Eman a bini cu un promesa falso, cu mientrastanto ya el a schrap despues di a crea speranza cerca grandinan cu e pensioen di behez lo bira un rio di oro pa nan.
Mike Eman na ultimo momento, a presenta un lista di candidato den cual el a bolter e camisa di once barras cu e tabata aden y a presenta na Pueblo di Aruba e candidato nobo Wendrick Cicilia como candidato number 1.
Sinembargo, imediatamente e mes a anuncia cu e mes ta keda liber pero debi na e forma cu Pueblo a acepta Cicilia, e mester a bay di acuerdo no solamente cu un duo pero cu e realidad cu sin Cicilia hamas AVP lo a ricibi e cantidad di voto cu a resulta den nuebe asiento.
Si AVP a gana eleccion cu alrededor di 300 voto mas cu MEP, tabata directamente basa riba e sanacion produci pa Wendrick Cicilia, cu practicamente ya na su salida a iguala Mike Eman den cantidad di voto.
Mike Eman na su biehez politico a ricibi 5277 voto y tabata Wendrick Cicilia cu a entrega AVP e cantidad di 4894 voto cu a haci cu AVP a gana eleccion.
Reino Hulandes mientrastanto a mustra claramente cu Aruba no por bolbe na e modelo di gobernacion di Mike Eman, na cual Reino mes a pone un fin ora pa motibo di Mike Eman Aruba a perde su autonomia y a cay bou supervision di Reino Hulandes.
Mientras Aruba ta te ainda en espera di un Gobierno nobo, un cos ta keda conoci. Aruba hamas por bolbe na e modelo di gobernacion di Mike Eman, cu ya mester a hala atras di su mentira di eleccion, cu e por subi pensioen di cual dentro di no mucho tempo e tambe lo mester goza.
Cu e formacion di Gobierno lo a tuma su tempo ta algo mas cu logico segun tur hende conoci cu reglanan pa gobernacion di Aruba cu no ta permiti un maneho manera den pasado Mike Eman a mantene pa destrui Aruba y haci cu ni su gobierno nobo, ora e sinta, por traha sin sigui regla cu Reino a impone.
Segun tur informacion ta hustamente e hecho cu Mike Eman mester funciona bou mando di Reino, ta causa tardanza den formacion di Gobierno nobo cu mester tene su mes awor na Ley y no por haci uzo di e modelo di gobierno Mike Eman, cu pa motibo di Statuut a haci cu Reino mester a interveni y a saca poder di gobernacion autonomo for di man di Gobierno Mike Eman y asina for di tur gobierno cu a sigui despues di e berguensa gubernamental na 2014 di Mike Eman!
