Iceland a proba cu vacunanan contra Covid-19 ta funciona

Hopi ta wordo contagia pero ningun hende a muri desde Mei di Covid

ORANJESTAD (AAN): Expertonan tin nan wowo dirigi pa cu e situacion di Covid-19 na Icelandia, pasobra nan ta demostrando cu pruebanan palpable cu vacunanan ta funciona bon!  Esey ta loke un di e expertonan Mericano di malesanan contagioso a splica.

   Iceland a raporta 2.847 infeccion nobo den ultimo luna, mayoria di nan a bin cu e variante Delta cu ta hopi contagioso, y mayoria di nan cerca hendenan cu ta completamente vacuna, segun statistica oficial a indica.  Esaki ta e cantidad di mas halto di contagio nobo den un luna di tempo desde cu e pandemia a cuminza, pero vacunanan ta demostrando cu nan ta haciendo nan trabao!  E gran mayoria di hendenan cu a haya Covid-19 awor na Iceland ta raportando cu nan sintomanan ta leve.

   Di e 1.239 ciudadano di Iceland cu a raporta di tin Covid-19 riba Diadomingo, solamente 3% ta den Hospital, segun data a indica.

   Iceland no a registra ni un solo morto debi na Covid-19 desde 25 di Mei, segun informacion di Oxford University ta mustra.

   Carlos del Rio, cu ta un profesor distingui di medicina na e Division di Malesanan Contagioso na Emory School of Medicine, a reacciona pa bisa cu Icelandia ta probando cu vacunanan ta funciona.

   Un otro, esta Brandon Guthrie cu ta un epidemiologo y profesional di salud global na Universidad di Washington ta di acuerdo.  Esta ora un pais ta registrando masha poco morto of hasta casonan severo di e malesa den e contexto di brotenan grandi, absolutamente tin di wordo mira como un victoria parcial.

   Iceland ta na di cuatro lugar na mundo den cantidad di hende vacuna, unda a vacuna 70.6% di poblacion.  E tres paisnan cu vacunacion mas halto ta Malta (80,5%), Emiratonan Arabe Uni (73,7%), y Singapore (73,1%).

   Mayoria di hende na Iceland a ricibi vacuna di Pfizer, cu ta como 88% efectivo contra e variante Delta di Covid-19 despues di dos dosis.

   Riba Dialuna, tin 306 persona di Iceland di 18 te 29 aña di edad cu ta den isolacion, compara cu djis cuatro hende riba 90 aña di edad, segun informacion di Gobierno.  Mas di 98,2% di hende riba 90 aña na Iceland a wordo vacuna completaente, compara cu 79,8% di hendenan entre 16 y 29 aña di edad.

   No obstante e exito di vacunamento na Iceland, toch oficialnan di Salubridad Publico ta keda mantene restriccionnan pa cu Covid-19 te cu 27 di Augustus.  Esey nifica cu keto bay maximo 200 hende por atende un encuentro, tin di keda mantene distanciamento social di 1 meter, ta recomenda tapaboca den lugarnan hopi yen, y negoshinan tin di cera 11:00 pm.  Clientenan sinta so mag di bebe alcohol.

    Diahuebs siman pasa, Iceland a cuminza duna dosis di booster na esnan cu a ricibi e vacuna di Johnson & Johnson.