IBiSA ta anuncia su di 41 edicion di “Turibana Loop”

ORANJESTAD (AAN) – Instituto Bida Saludable y Activo (IBiSA), a convoca un conferencia di prensa, den cual William Erasmus, Functional Fitness Aruba y Hefe Interino Deporte,

a duna informacion tocante e di 41 edicion di e evento: “Turibana Loop”, cu lo tuma lugar dia 12 di September venidero.

William Erasmus a informa cu e carera aki ta bay tuma lugar na MFA Noord, manera tur e añanan anterior, y e ta cuminza pa 6'or di mainta.

E ta pidi tur hende tene na cuenta con e situacion di pandemia ta bayendo, y IBiSA ta keda pendiente di kico por pasa. Pues, pa ta atento cu por bin cambio, por bin mas regla y keda hopi cauteloso cu esaki, ademas sigui e informacionnan den prensa. Na ta sigui hopi e noticianan di DVG, pero ta haciendo algo toch pa e comunidad di Aruba haci deporte.

El a bisa cu e distancia ta keda igual cu tur e añanan anterior, esta 10.5 kilometer pa individual y 10.5 kilometer pa e team cu lo wordo parti den dos; 5.25 pa un coredor y  5.25 pa e otro coredor.

El a menciona cu inscripcion a cuminza Diabierna 20 di Augustus awo y ta caba dia 3 di September. Aworaki tin cupo pa mil participante, Erasmus a indica, pero pendiente di e situacion si lo mester bin cambio cu por bin den fecha, con nan ta start e careda, of si lo bay den diferente horario.

Erasmus a bisa cu nan lo haci nan maximo esfuerzo pa e careda bay door lo mas sigur posible.

Seguidamente, Rafael Perez, Coordinador Deportivo a hiba palabra y a pone enfasis cu e aña aki lo no tin careda di mucha, pa motibo di circumstancianan imprevisto.

El a reitera riba e importancia di keda cla cu registracion. Lo bay tin un servicio di bus charter pa hiba e personanan cu ta core e di dos pida di e careda, e distancia di 2.25 kilometer, na e relate punt. E bus ta sali 5.30  or y pesey ta pidi pa bay un tiki mas trempan y registra na e desk di registracion, pa asina tur cos bay nechi.

E prome 300 personanan cu registra lo ricibi un recuerdo bunita di IBiSA, Perez a menciona. Pa motibo di e situacion actual di pandemia y e protocol di DVG lo no tin publico y tampoco lo parti e premiacionnan. Esaki lo tuma lugar riba otro fecha unda lo haci e ceremonia den dos parti. E prome dia pa e damanan y e di dos dia pa cabayeronan. Pa mas informacion por bay na IBiSA su Facebook page.