Alexia Chin a sali pa participa na certamen na Costa Rica

ORANJESTAD (AAN): Diadomingo mainta a sali pa Costa Rica, e beyeza local Alexia Chin, kende den pasado tabata finalista pa Miss Youth Aruba 2019 representando distrito di Noord.

   E candidata di 20 aña di edad a sali pa bay competi pa e certamen di “Reina Internacional de los Mares y Turismo” cu pa di diez aña ta wordo organiza.

   Prome cu su salida, Alexia a splica cu tin 15 pais ta participando, y nan ta den diferente categoria, e.o. Infantil, Pre-Teens, Teens, y hasta di Señora.  Lo tin como 6 candidata pa e categoria den cual Alexia ta bay competi pe.

   Alexia a bisa cu e ta orguyoso di por representa su isla den exterior.  “E ta algo nobo pa mi, pero e ta un reto cu semper mi kier a tuma,” el a bisa.

   El a bisa cu e certamen aki mester a tuma lugar na Mei 2020, sinembargo debi na e pandemia esaki a wordo cambia di fecha.  Pero esey a nifica cu ya desde aña pasa caba el a cuminza cu su preparacion.  El a haya sosten di Roberto y Rodolfo di The Salon, Robin Croes-Ponson, Susan Kelly, Edson Everon, y demas miembronan di Miss Youth Aruba.   Tambe el a gradici su mayornan pa e sosten ricibi.

   E ta bisa di awor caba danki na tur esnan cu a apoye.  Alexia a indica cu riba social media e lo pone diariamente update di loke e ta haciendo na Costa Rica, riba su account di ‘Miss Aruba Reina Internacional de los Mares y Turismo’, y el a indica cu e lo trece e corona cas.

   E certamen mes lo ta Diasabra 28 di Augustus na Barceló Tambor, cu ta keda na Tambor Beach, na e parti di Oceano Atlantico.