Pa 11’or di mainta ya caba 597 persona a vacuna

Exitoso Diadomingo di Vacunathon: - ORANJESTAD (AAN) – Chris Goedhart, Beleidsmedewerker na Departamento di Salud Publico (DVG),

den un declaracion pa prensa tocante e vacunathon-3.0 di Diadomingo ultimo, a duna di conoce cu e demanda pa haya vacuna tabata grandi, na Ritz Carlton, unda esaki a tuma lugar.

Pa 11 or di mainta ya caba, 597 persona a keda vacuna. Mayoria di nan tabata tin e prome shot, y 26% a bay pa nan prome shot, entre nan hopi mucha di 12 pa 17 aña, cu a bay acompaña pa nan mayornan, cu tabata 85% di e personanan cu a wordo vacuna.

For di mainta trempan tabata tin un rij pafo y nan a purba di vacuna mas hende, mas lihe posible, pasobra e localidad tin un capacidad di 134 stul paden, y manera e protocol ta bisa cada persona cu ta wordo vacuna mester warda 15 minuut.

DVG tabata hopi contento di mira e interes pa haya e vacuna. Goedhart a bisa cu tabata un tiki fastioso si, di wak cu tabata tin ainda un rij largo pafo, y nan kier a vacuna mas tanto hende posible durante e vacunathon aki.

Tabata tin suficiente enfermero y docter cu tabata yudando. Pa e parti logistic Chris Goedhart a gradici AZV, SVb, docternan di cas, Wit Gele Kruis, pa tur nan asistencia pasobra esaki lo no tabata posible sin nan yudanza.

Nan a vacuna den un lugar cu menos espacio pasobra algun siman pasa e demanda a cuminza baha, pero diadomingo hopi hende a bin ricibi e vacuna, loke posiblemente tin di haber cu e medidanan cu a wordo tuma, y cu e variante Delta ta mas agresivo. Tambe e personal cu nan tabata tin prome no tine aworaki y a purba hunto cu partnernan bin na un ekipo, toch grandi, pa yuda nan.

Chris Goedhart a bisa cu enberdad, cientificamente a wordo comproba cu e vacuna Pfizer ta un tiki menos efectivo pa loke ta e variante Delta, pero toch e ta keda hopi halto. E vacuna ta haci su trabao y aworaki ta hopi importante pa vacuna mas hende posible mirando cu e Delta ta esun cu ta plama mas.

El a reitera cu Pfizer ta un vacuna cu ta consisti di dos dosis cu un distancia di tres siman entre e prome y e di dos shot, cu excepcion di muchanan bao di 18 aña cu a haya covid prome cu nan prome shot, ya cu un vacuna ta suficiente pa nan tin un grado di proteccion halto.