Ibero American High School ta expande su departamento di multimedia cu robotica y XRP

ORANJESTAD (AAN): Meta di Ibero American High School ta pa sigui expande den direccion di tecnologia den su curiculo escolar.

Docentenan di e scol recientemente a sigui cursonan specialisa den robotica y XRP (Experiential Robotics Platform) cu e obhetivo pa introduci e materia aki den e prome klassnan durante e proximo aña escolar.

   Segun docente di Multimedia na Ibero High, señor Richard Jacobs, pa nuebe aña caba e scol ta conta cu un departamento di multimedia exitoso, y awo nan kier explora otro posibilidadnan cu tecnologia ta ofrece, cuminsando cu robotica. El a splica cu esaki lo yuda hobennan desaroya nan habilidadnan tecnico y prepara nan miho pa nan futuro estudio, inclusivo den exterior.

    Robotica ta combina tecnologia, ingenieria y innovacion pa crea mashinnan inteligente cu por yuda den diferente tipo di tarea. Cu The Experiential Robotics Platform (XRP), studiantenan no solamente ta siña teoria, pero nan ta arma y programa nan mes robot of mashinan segun loke nan kier cu e robot haci, sea move, sigui comando of hasta pinta. E programa tambe ta inclui enseñansa completo di software, coding y solucion di problema, dunando studiantenan experiencia practico, tecnico y creativo den mundo moderno di tecnologia.

   Riba e tema di Inteligencia Artificial (AI), señor Jacobs a indica cu AI tin hopi bentaha, pero cu tambe mester uza cu responsabilidad y cuidou. El a splica cu AI no semper ta ofrece e resultado desea of informacion 100% corecto. Pa e motibo ey, e ta conseha pa studiantenan semper domina e basiconan di diseñonan y programacion. “Bo mester sa con pa uza programa manera Photoshop y otro software pa drecha of modifica loke AI ta crea,” Jacobs a expresa.

   Hobennan cu ta interesa pa bira alumno di Ibero High y kier sigui den direccion di tecnologia, por registra y inscribi na e scol pa un trayecto di 4 aña di estudio, unda automaticamente nan lo ricibi enseñansa den e area aki.