Segun Diego di Cuba, lider STA:
- Y no lag’e den man di Gerencia so
ORANJESTAD (AAN)- Diego de Cuba, presidente di Sindicato STA, a sigui bisa den entrevista cu Matutino DIARIO, cu mester corda cu Serlimar ta un compania hopi importante pa Aruba.
“Limpieza di nos Isla ta depende di cierto companianan y nos por wak ultimamente, con tin hopi caminda cu gewoon, hendenan ta cuminza crea un dump. Anto, mi ta bisa ‘e cosnan ey no ta bon’. Mester bin solucion pa esaki anto rapido, pasobra manera nos ta bisa ‘si bo kier un Aruba dushi, e mester ta sin sushi’. Pero locual cu ta pasando aworaki, ta increibel. Anto den pueblo, tin hopi hende, concientemente, ta haci e cosnan aki y tin solucion pa nan”, Diego de Cuba a reitera.
Biniendo bek na e situacion di e trahadornan di Serlimar sui generis, De Cuba ta kere cu mester por tin espacio, of bay crea espacio, pa e personanan aki por ricibi un miho entrada.
“Den nos concepto como Sindicato STA, nan merece esey. Mi ta kere cu Gobierno mester bay wak e situacion aki mas di cerca, y no lague solamente den man di e Gerencia di Serlimar, pero conhuntamente bin cu solucionnan structura. Pasobra Serlimar por haci hopi cos” el a reitera. E ta corda cu ‘prome aya’ Serlimar tabata tin un departamento cu tabata haci limpieza riba pida tereno pa peticion, y nan tabata genera placa. “Y asina ey tin hopi opcion mas pa Serlimar, por bira mas grandi y genera mas entrada. Aworaki tambe, mi kier sa, e ley cu mester a pasa tocante e pago, e ta pega. Mi ta bisa, shonnan, ban drecha e cos aki pa caba”, Diego de Cuba a enfatiza.
El a reitera cu tin hopi aspecto cu mester cuminza traha riba nan structura, y eseynan mester wordo soluciona, pasobra Serlimar su servicio awo ta tremendo, nan ta dunando un bon servicio.
“Pero pa por mantene eynan e trahador mester di un incentivo tambe, a mi ta pensa cu nos mester cuminza den e direccion ey. Ami no por imagina Aruba un siman plat sin Serlimar. Un desastre!”, De Cuba a vocifera.
Finalmente Diego de Cuba a informa cu na Juni proximo, STA tin programa un reunion cu Gerencia di Serlimar, pa wak si nan a contesta tur e preguntanan cu a wordo haci durante nan ultimo reunion y wak ki contestanan nan lo por tin.
