Gerlien Croes ta fortalece colaboracion cu NHL Stenden University di Hulanda

Pa amplia oportunidadnan di estudio pa Aruba

ORANJESTAD (AAN): Como parti di su agenda oficial na Hulanda, Minister di Relacionnan den Reino, Educacion, Hubentud, Innovacion y Deporte, señora mr. Gerlien Croes, a continua e dialogo cu NHL Stenden University of Applied Sciences, despues di un encuentro inicial cu e institucion algun siman atras na Aruba.

   Durante e reunion na Hulanda, Minister Gerlien Croes hunto cu representantenan di NHL Stenden a dialoga riba diferente topiconan di interes riba area di Educacion Superior, cu enfoke riba ampliacion di oportunidadnan academico pa studiantenan di Aruba. Entre e punto nan trata tabata posibilidadnan pa amplia ofertanan di estudio riba nivel di minors, inventarisacion di estudionan nobo cu por wordo introduci na Aruba, y con pa sigui fortalece colaboracion estrecho cu Universidad di Aruba y otro institutonan educacional local.

   Un momento special durante e bishita tabata e encuentro cu studiantenan Arubiano Andrew y Camron, kendenan actualmente ta sigui nan estudio na NHL Stenden. Minister Gerlien Croes a expresa su orguyo den nan desaroyo academico y a enfatisa e importancia di continua na crea oportunidadnan pa mas hobennan Arubiano por sigui educacion di calidad tanto local como internacional.

   NHL Stenden ta conoci pa su enfoke innovador basa riba Design Thinking, un modelo educativo cu ta pone enfasis riba solucion creativo, colaboracion y siñamento practico—elementonan esencial pa prepara studiantenan pa e demanda di mercado laboral moderno.

   “Nos ta continua na inverti den colaboracionnan strategico cu institucionnan internacional pa asina amplia e cantidad di oportunidadnan pa nos studiantenan. Educacion ta e base di desaroyo sostenibel di nos pais, y hunto nos por crea camindanan nobo pa futuro di nos hobennan”, Minister Gerlien Croes a enfatisa.

   Cu e dialogonan aki, Gobierno di Aruba ta reafirma su compromiso pa fortalece sector educativo, stimula innovacion y amplia acceso na educacion superior di calidad pa tur ciudadano.