Huramentacion y entrega di diploma  y certificado

Cla pa sirbi nos pais

ORANJESTAD (AAN):  Scol  di Polis  E.J.  Watty Vos  tabata diabierna  ultimo yena cu famia, amigonan  y colega pa un ocasion  special. Den presencia  di Minister  di Husticia  mr. drs. Arthur Dowers,  Procurador-Generaal sra. Amalin Flanegin, Altocomisario di Polis  drs. Ramon Arnhem  conhuntamente mando policial, staff  y personal  di Scol  di Polis  E.J.  Watty Vos,  a haci entrega di diploma  MBO na Klas  N4-2021,  huramentacion  di klas  2023 y entrega di certificado Sub-Fiscal tambe certificado di “leren  les geven” na docentenan di Scol  di Polis  E.J.  Watty Vos.

Diesun studiante di klas  N4-2023  a huramenta dilanti  Minister  di Husticia  pa asina  nan por sigui  cu e siguiente fase pa por subi caya  y sigui  cu nan estudio policial.

Klas  N4-2021  a termina nan estudio policial di cuater aña. Nan a firma  nan diploma  di MBO Policial. Despues di 4 aña intensivo  di training  y preparacion  policial como tambe estudio di ley  nos tin 20 agente policial nobo pa sirbi  nos comunidad.

Riba  e ocasion  special aki tambe dies personal  tanto di KPA y Landsrecherche, cu a termina nan curso di Sub-Fiscal a haya  nan certificado oficial. Tambe nuebe docentenan di scol di Polis  E.J.  Watty Vos  cu a sigui  e curso di “Leren  les Geven”   tambe a haya  nan certificado.

Cuerpo Policial Aruba  ta gradici  cada famia di e agentenan  cu a bin presencia  e momento special  aki.  Esaki  ta un etapa importante pa e agentenan  pero ta danki na e sosten di famia cu ta haci esaki  posibel.

Cuerpo Policial Aruba  ta orguyoso  di mira progreso  y desaroyo  personal  na cada agente policial tambe miembronan  di Landsrecherhe. Mas conocimento  nifica  progreso  personal  pa nan mes pa nan carera  policial. Hopi exito  den futuro y masha  pabien!