Relacionista Publico di DIMP, Meverly Romano:
- Desde e conferencia di prensa hopi hende a acudi na DIMP pa haci nan pago
ORANJESTAD (AAN) Señora Meverly Romano, Relacionista Publico di Departamento di Impuesto (DIMP), a informa den entrevista cu Matutino DIARIO, tocante e cantidad di citanan pa plachi number, cu di 80 cu tabata tin registra na momento cu a duna e ultimo conferencia di prensa, a aumenta na mas di mil pa e periodo di October venidero te cu Januari proximo.
“Nos tabata tin e momento ey 14.235 persona persona cu no a cumpli debidamente, y di cual nos tabata tin 5.554 number cu no tabata tin pago di aña 2025; e ta un grupo cu tur aña nos ta wak, cu ta entre 18% cu 20% di e cantidad di numbernan cu nos tin, cu no a paga belasting tur aña y tambe nos tin 6.661 persona, cu a paga e prome mita di aña y no a paga e di dos mita. Kiermen, e incumplimento total tabata 14.235. Nos a ripara, desde e conferencia di prensa, cu hopi mas hende a acudi cerca nos pa haci nan pago. Nos a tira un bista tambe den e agenda cu tur e citanan cu a wordo registra den e dianan aki, ta personanan cu awo, na September, a core bin paga y mayoria di nan a paga despues di 30 di Juni, pues despues di e deadline”, señora Romano a duna di conoce.
El a señala cu nan a paga si, despues di 30 di Juni, pero posiblemente nan seguro lo no tabata na ordo y awo e citanan a aumenta bek.
“Siman pasa, ora nos a tene nos conferencia di prensa nos tabata tin 80 cita so registra di October pa December pasobra e masa nos a percura pa hala nan mas dilanti, den Augustus cu September, y na e momento aki nos ta atendiendo e masa eynan, pero e ultimo siman aki mi por bisa cu e cantidad di citanan a aumenta cu mil diesdos. Aworaki nos tin total 1.092 cita cu e mayoria ta den e prome siman di October, cu nos ta yuda ainda; tin personanan cu a actua hopi lihe y nan a logra haya un cita prome cu 1 di October”, Meverly Romano, PR di DIMP a señala.
