In Memoriam
ORANJESTAD (AAN): Un articulo pa cortesia di Departamento di Cultura di Aruba DCA).
Cu gran tristesa y profundo dolor den nos curason, nos ta tuma nota cu nos querido y legendario musico Robert JeanD’or a bay laga nos recientemente.
Robert JeanD’or tabata un di e pilarnan cultural mas grandi di Aruba, un homber cu su talento, humildad y dedicacion pa musica a trece inspiracion na generacionnan riba generacion. Den su trayectoria impresionante di mas cu 55 aña, Robert a desaroya un carera musical cu no solamente a pone su nomber ariba mapa cultural di Aruba, pero tambe internacionalmente a expone nos isla como centro di atencion.
Un Bida den Musica: Desde su cuminsamento cu ritmonan di baile na Radio Kelkboom, su participacion den bandanan conoci manera Blancas Palomitas, Los Juveniles, Los Lirios y The Boys, La Nueva Fuerza te su trabounan como musico profesional hunto cu grandinan internacional manera Johnny Ventura, Celia Cruz, Oscar D’León, Larry Harlow, Bobby Valentín, Wilfrido Vargas, Frankie Ruiz y, Juan Luis Guerra y hopi otro, Robert semper a briya cu un nivel di excelencia.
Su musica a resona den baile-, show-, festival- y grabacionnan internacional, incluyendo presentacionnan na Madison Square Garden na New York, Colombia, Puerto Rico, Republica Dominicana, Miami y hopi otro escenario di renombre. El a graba disconan historiconan cu; Hijos del Rey, El Gran Combo y Internacionalmente su participacion cu Johnny Ventura riba e album iconico El Caballo Mayor, como tambe a graba cu Juan Luis Guerra. Despues cu ela regresa Aruba ela lanta su banda Robert y su Solo Banda Show cu tin mas di 30 aña di existencia y semper a keda activo.
Reconocemento y Homenahenan: Durante su carera extenso Robert JeanD’or a ricibí hopi homenahe y premiacion:
(*) Rey di Tumba (Aruba) – Robert a gana e titulo prestigioso di Rey di Tumba un total di cinco biaha. E prome tres consecutivo (1976, 1977, 1978) y despues den 1990 y 1991, consolidando su lugar como un di e compositornan y musiconan mas influyente den historia di Carnaval di Aruba.
(*) Premio “Crioyo di Oro” (2023) – Na 2023, Gobierno di Aruba, pa medio di Ministro di Cultura, a honra Robert cu e Premio Crioyo di Oro, un “lifetime achievement award” pa su gran aportacion cultural y musical na Aruba y su papel crucial como embahador cultural internacional.
(*) Reconocemento Oficial di Gobierno di Aruba – Durante su bida, Robert a ricibi diferente homenahe formal di parti di Gobierno di Aruba, pa su dedicacion y exito den representacion cultural di nos isla. Robert ta un ehempel bibo di nos patrimonio cultural y orguyo nacional.
(*) “Den Ambiente Awards” (1992) – Johnny Ventura mes a viaha pa Aruba pa entrega un reconocimiento special na Robert, exaltando su merito como musico arubiano cu un carera amplio y influyente den mundo di merengue y salsa.
(*) Reconocementonan Internacional – Su trabou y colaboracion cu orkestanan mundial y su presentacionan ariba escenario grandi, lo keda como prueba di su impacto internacional. Na Republica Dominicana, Robert tabata conoci como un di e musiconan mas respeta den e genero di merengue y salsa.
Mas importante cu su talento musical, Robert JeanD’or tabata un berdadero embahador di Aruba. Cu cada nota y cada presentacion, e la mustra cu un isla chikito manera Aruba tin un bos grandi den mundo di cultura y musica. Su inspiracion a habri caminda pa hopi musico hoben di nos isla, y su legado lo sigui vibra den tur nota di salsa, merengue, bolero y musica tropical cu a sali di su man.
Despedida: Henter comunidad cultural y musical di Aruba ta lamenta su perdida, pero alabes nos ta celebra un bida pleno di talento, dedicacion, pasion y entrega.
Departamento di Cultura Aruba ta expresa nos mas sentido palabra di condolencia na su casa Vivian, su yiunan, demas famia, amigonan, compañeronan musico y tur esnan cu Robert a inspira den su bida.
Descansa na pas, E Legendario Robert JeanD’or.
Bo musica y bo legado lo keda eterno den e historia di Aruba y den nos cultura Caribeño.
