“Hunto nos tin cu sigui haci e comunidad mas bunita”

Henriette Hulsbosch di Samenwerkende Fondsen Caribe:

ORANJESTAD(AAN): Recientemente Gobierno di Aruba a firma un protocol cu CEDE Aruba y Samenwerkende Fondsen Cariben, pa fondonan bira disponibel pa  proyectonan pa yuda esnan vulnerable den nos comunidad.

 E protocol aki ta conta pa un periodo di 5 aña, cuminzando dia 1 di Januari 2022 y lo dura te cu December 2026.

E relacion y cooperacion entre Gobierno, CEDE Aruba y Samenwerkende Fondsen Cariben tin un historia largo. Desde 2004, CEDE Aruba a fungi como partner den co-financiamento. Durante casi 20 aña, e cooperacion a sostene un cantidad grandi di proyecto aki na Aruba y a yuda crea un infrastructura valioso di NGO’s.

Pa loke ta Samenwerkende Fondsen Cariben, e ta consisti di 5 fondo grandi Hulandes cu ta: Oranje Fonds, Kansfonds, Stichting Kinderpostzegels, Fonds Sluyterman van Loo y RoomschCatholijkArmenkantoor (RCOAK). Cada fondo tin un otro enfoke, por ehempel desaroyo di bario, pobreza, actividad pa adulto mayor, hende cu limitacion, gruponan vulnerable, etc.

Durante un conferencia di prensa, representante di Samenwerkende Fondsen Cariben Henriette Hulsbosch a trece dilanti cu e ta hopi contento cu e ayudo di CEDE Aruba como un persona di contacto cu Hulanda pa haci posibel peticionnan y iniciativanan bunita.

“Tin hopi pa wordo haci riba e isla aki y nos como Samenwerkende Fondsen ta orguyoso cu nos por aporta cu esaki financieramente, pero tambe cu algun conocimento”.

Hunto nos tin cu sigui haci e comunidad mas bunita, segun Hulsbosch.