Cinco mucha di cada scol basico a bira parti di e marcha riba Dia di Mucha

ORANJESTAD (AAN):   Riba Dia Internacional di Derechonan di Mucha, a organisa un marcha pa celebra e dia aki.

Michella Steenvoorde-Lacle, Beleidsmedewerker na Ministerio di Husticia y Asuntonan Social a bisa den entrevista cu DIARIO cu esaki ta un dia caminda cu nacionnan ta celebra cu 80 aña pasa, Nacionnan Uni a traha e derechonan di mucha.

E derechonan di mucha ta 54 articulo caminda nan ta stipula kico ta e derechonan cu e muchanan tin. Tur pais miembro di United Nations a firma esaki. Aruba tambe a firm'e na 2001.

Desde e tempo ey, e tarea di gobierno y como pais ta pa haci tur cos posibel pa cumpli cu e derechonan aki di e muchanan, Steenvoorde-Lacle a remarca. 

Pa loke ta e marcha, el a bisa cu door di e medidanan di Covid-19 a invita cada scol basico cu 5 mucha y dos begeleiders. Cada scol basico a haya dos derecho pa cana cu ne.

E muchanan a line-up riba Plaza Nikki Habibe y eynan a cana marcha pa e derechonan den Caya Betico Croes pa yega na Plaza Padu unda tabata tin un acto protocolario unda algun minister a hiba un discurso.

A finalisa bisando cu eynan e muchanan di scouting a hisa e bandera y e muchanan di Pierewietje a canta y baila. Tabata tin dino jump, carousel y otro actividadnan pa e muchanan. E muchanan tambe a haya un treat.