35 aña despues di Status Aparte un escenario similar ta wordo crea awe --- *Sin Betico Croes un Status Aparte diferente a bira realidad di Aruba ---*Salida Lago a habri oportunidad pa un lucha perde su contenido
ORANJESTAD(AAN)—E siman aki cu un congreso special, Aruba lo recorda con el a realisa su anhelo grandi pa Status Aparte, cu tabata e motibo di nacemento di DIARIO.
E siman aki DIARIO ta recorda tambe, con den madruga di 26 di November 1986, redaccion mester a prepara e edicion cu lo a anuncia na Aruba, cu Betico Croes a bandona e mundo aki pa semper.
Durante e siman aki pues, tres aña historico pa Aruba lo bini dilanti na diferente forma. Pero pa hopi cu a entrega nan alma pa e lucha di Status Aparte, e realidad historico di 1983 pa 1986 lo keda silencia.
Awe ta hustamente na e momento aki nos kier para keto, pasobra por mira con diferente elemento di ayera, ta presenta den e awe cu mester produci un recuperacion di autonomia financiero di Aruba.
E lucha cu Betico Croes a inicia na 1971, a culmina na e Conferencia di Mesa Rondo di 7 pa 12 di Maart 1983 na Den Haag.
No tabata tin union Arubano na e conferencia, caminda Reino Hulandes a bay di acuerdo cu Status Aparte dia Prome di Januari 1986 y Independencia na 1996.
Status Aparte tabata un strategia cu Betico Croes a inventa pa alcansa e autonomia di Aruba den Reino den un periodo estatal, cu a resulta for di e proceso di decolonisacion di e islanan Hulandes den Caribe y formacion di Antia Hulandes y teritorionan insular.
Betico Croes a rebiba e lucha cu a wordo tranca ora Aruba a keda rehen di boluntad di politiconan di Curacao pa motibo di su participacion den Parlamento di Antia.
E formula cu a acepta na Hulanda, a laga caminda habri pa loke a socede despues, cu Nelson Oduber a logra deshaci di Independencia despues di 1986.
1983 pa 1986, no a bira e epoca di alegria y gozo cu a spera pa hopi motibo.
E sucesonan na Veld di Winston, caminda Betico Croes a wordo herida, no por wordo lubida.
Na 1983 tambe e negociacionnan entre Exxon y Venezuela pa prijs preferencial di petroleo a tranca.
Mientrastanto, expertonan di Aruba a base di e planificacion dirigi pa Betico Croes, a sigui traha riba realisacion di e pais Aruba cu tabata mucho mas cu solamente planificacion financiero.
Despues di logro di Status Aparte, e oposicion contra Betico Croes tabata mas grandi cu nunca. Baha Betico Croes, tabata e mensahe di politiconan opositor, cu den e salida di Lago a haya un oportunidad pa deshaci di Betico Croes como futuro Prome Ministro di Aruba autonomo.
Oposicion a logra kita e coronacion di e obra di Betico Croes for di e lider cu a inventa Status Aparte y a dirigi e lucha pisa, cu hopi sacrificio di Aruba.
Un gobierno forma pa opositornan di Status Aparte y e funcionamento di e pais cu a wordo crea pa Betico Croes, a haya mando di Aruba.
E constructornan, e ingenieronan estatal di Aruba, cu tabata tin conocemento di loke nan a planifica, mester a hala atras.
Betico Croes a fayece dia 26 di November, 1986.
E no a laga solamente un situacion estatal nobo cu lidernan cu no tabata conoce loke el a planifica, atras.
Aruba a conoce un mentalidad nobo.
Historia real, e momentonan di culminacion pero tambe di lucha directo di e Pueblo di Aruba pa Status Aparte bou direccion di Betico Croes, a wordo silencia.
Aruba tabata tin mester di placa pa sigui dilanti despues di 1986.
Placa cu tur hende mester pero e necesidad di Pueblo a wordo uza den un comunidad cu a cambia.
Awe nos ta contempla loke ta pasa na Aruba. DIARIO for di inicio ta analisa e trabou di Evelyn Wever-Croes como dirigente di Aruba, cu na 2020 mester a subi un caminda nobo.
Cu un maneho fuerte Evelyn Wever-Croes a dirigi Aruba den e tormenta mundial manera expertonan mundial y Reino a confirma.
Awe, den e mes grupo cu a orkestra e uzo di salida di Status Aparte contra Betico Croes, intentonan contra Gobierno Evelyn Wever-Croes ta wordo orkestra.
Pa comprende oposicion di awe, mester bolbe na pasado. Mester bolbe na e tempo silencia di 1983 pa 1986, cu a duna prueba con por silencia e logro di un lider manera a socede na 1986 cu Betico Croes y aparentemente mester socede awe cu Evelyn Wever-Croes.
