Hunto cu Hulanda a cuminza cu Fase 1 di e Agri Innovation Park

Minister Geoffrey Wever:

ORANJESTAD (AAN): Minister Geoffrey Wever ta anuncia cu Gobierno di Aruba cu sosten di TWO- Nederland a apunta sr. Elwin Groenevelt como projectmanager pa haci e prome “Agri Innovation Park” di Aruba un realidad. Via ampliacion di Landspakket, e desaroyo di e “Agri Innovation Park” ta e di dos proyecto cardinal pa transforma e sector di agricultura den un sector economico innovativo y asina contribui na diversifica Aruba su economia.

   E prome proyecto tawata ehecucion di e estudio pa Priva/ Greengrounds riba e uzo optimal di “greenhouses” den agricultura comercial na Aruba. Resultado di e estudio aki lo wordo uza tambe pa traha prome “Agri Innovation Park” di Aruba y asina dal pasonan concreto pa e sector di agricultura bira un sector economico importante. Crea sectornan economico nobo ta un di metanan di e maneho economico inclusivo di Gabinete AVP-Futuro.

   Como projectmanager sr. Elwin Groenevelt lo ehecuta fase 1 cu ta bira e base pa construi e “Agri Innovation Park”. Fase 1 ta un plan di preparacion cu lo inclui un estudio di e mercado y viabilidad economico di e “Agri Innovation Park”, un model financiero-operacional-organisatorio cu ta inclui tambe un plan di inversion pa realiza esaki y diseño tecnico y maneho di e facilidadnan y infrastructura di e parke. Tambe lo traha un planning pa fase 2 y 3 cu lo ta encera e construccion y maneho di e “Agri Innovation Park”. E parke lo contribui na aumento di produccion di alimento local, reduccion di dependencia di importacion, y promocion di siguridad alimentario pa medio di tecnologianan moderno y ofreciendo sosten na empresarionan agricola.

   Pa financia y ehecuta fase 1 di e “Agri Innovation Park”  Hulanda ta pone 75.000 dollar disponibel via Landspakket, y Aruba ta pone 10.000 dollar via begroting di Ministerio di Asunto Economico. E aplicacion di e ‘Landspakket’ como instrumento ta trece structura pa e desaroyo di pais Aruba y ta facilita e creacion y ehecucion di varios proyecto concreto na un manera integral. E cooperacion cu Hulanda a resulta di ta uno positivo cu a trece beneficio den forma di experticio, ayudo financiero y asistencia  tecnico. 'Landspakket' ta un instrumento extra cu Aruba tin na su  disposicion por avansa e maneho necesario y realisa e vision economico di Aruba den bienestar di tur ciudadano, y mester percura pa continua haci bon uzo di e cooperacion aki.

   “Experticio, netwerk y experiencia na Hulanda, Europa y e islanan Caribense den Reino Hulandes di sr. Elwin Groenevelt ta trece un balor agrega grandi pa Aruba construi su prome Agri-Innovation Park,” segun Minister Geoffrey Wever.  Gabinete AVP- FUTURO tin pleno confiansa cu pronto e parke aki ta bira un realidad unda cu nos localnan den un manera structura y uzando technologia innovativo por cuminsa produci fruta y berdura localmente y contribui na nos economia y seguridad alimenticio.”