Hunto cu Directie Natuur en Milieu a traha un plan pa atende cu malesa di coral na Aruba

Van der Wal di Fundacion Parke Nacional Aruba:

ORANJESTAD (AAN):   Relaciona cu e malesa di coral cu ta afectando Caribe, Sietske van der Wal, kende ta Conservation Education Manager na Fundacion Parke Nacional Aruba (FPNA), a duna di conoce cu tin basta area bao lama na Aruba cu tin coral cu malesa.

            Ta hayando for di diferente area rond di Aruba algun raportahe, pero pa esaki a train un grupo y duna charlanan informativo riba dos diferente momento tambe pa un grupo di 24 persona pa bay yuda cu un sondeo eyfo pa haya un miho bista y pa concretisa e infeccion cu tin actualmente, a bisa.

            Tambe nan ta getrain pa por confirma si ta trata di 'Stony Coral Tissue Loss Disease' si of no, a agrega.

            Van der Wal a sigui bisa cu e personanan aki ta 'divers' for di diferente sector como tambe piscadonan.

            E malesa aki ta pasando den Caribe y no ta algo nobo. Ya caba na 2014, el a cuminsa na Florida y mayoria biaha e corientenan cu ta pasa den Caribe, na 2020 ya caba por a mira cu e tabata den Caribe unda ya caba por a premira cu e lo a yega Aruba, a splica.

            El a declara tambe cu Directie Natuur en Milieu a yama FPNA aden pa yuda y pa conhuntamente traha riba un plan con pa trata e malesa aki y prepara pa e malesa aki.

            Hunto cu expertonan di afo, di e region y internacional ta buscando constantemente informacion riba loke a wordo siña caba eyfo  for di otro paisnan. Pesey mester keda adaptivo tambe.

            Asina a adapta un plan unda tambe mester realisa tur e fuentenan cu por tin pa trece e malesa na Aruba. Ya caba a realisa cu no tin un manera pa stop e malesa yega Aruba, pero mester wak con por baha e velocidad cu cual e ta plama na Aruba, a remarca.

            Pesey ta haci un suplica na tur hende pa haci uzo di e protocol di contaminacion pa asina e contagio di e malesa wordo reduci un tiki pa naturalesa  haya chens di adapta, mientras cu e malesa aki ta plama, Van der Wal a indica.