ORANJESTAD (AAN): Ateliers ‘89 ta cla pa un workshop nobo di Ceramica duna pa e artista maestro procedente di Venezuela,
esta e conocido artista maestro cu trayectoria internacional Samuel Sarmiento, cu ta cuminzando Dialuna 5 di Juni.
Publico ta invita pa participa na e workshop aki, unda lo explora trahando cu klei, siñando e forma nan basico of manual modelando usando hermentnan di trabao y tambe usando obhetonan di cada dia, como molde pa forma ceramica. E meta di e workshop aki ta pa evoluciona e posibilidadnan expresivo di ceramica pa crea asina sculturanan chikito, tayo, copi y otro obheto nan cu man. Lo siña tambe pa decora y dibuha riba klei creando diferente posibilidadnan grafico. E sesionnan aki lo worde acompaña pa referencianan visual cu relacion na pintura nan contemporaneo y diferente tecnica di ceramica.
Samuel Sarmiento naci na 1987 na Venezuela, ta un artista cu a siña su mes, y el a participa den diferente exposicion, tanto individual como colectivo na Aruba, Venezuela, Spaña, Hulanda, Argentina, y China.
Su obra ta consisti di caracternan enigmatico, cu ta dune un aire di algo straño, inconformismo y incertidumbre hunto cu un sensacion ludico y irreal. Su obra ta un viahe via di dibuho y ceramica inspira pa popular storianan di Caribe. Samuel ta biba y traha na Aruba.
E workshop aki lo ta riba Dialuna pa Diahuebs for di 5 di Juni te cu 30 di Juni 2023. Nan ta for di 6:30 pm te cu 9:30 pm, pa edad di 12 aña pariba. Por inscribi via email na This email address is being protected from spambots. You need JavaScript enabled to view it. y corda cu cuponan ta limita.
