ORANJESTAD (AAN): Caribbean Mercantile Bank N.V. (CMB) ta orguyoso di su sosten continuo na Ronde Van Aruba, e evento di careda mas grandi di e isla, pa di 31 aña consecutivo.
“E aña aki, nos compromiso cu deporte y e Obhetivonan di Desaroyo Sostenibel (SDGs) ta bay mas leu cu deporte mes, ya cu nos ta patrocina tambe e fundacion nobo Beyond Sport Limits Foundation, un organizacion sin fin di lucro cu ta enfoca riba promove inclusion y dignidad den deporte pa personanan cu limitacion fisico”, Sr, Ilán Lopez di Caribbean Mercantile Bank N.V. ta expresa.
Beyond Sport Limits Foundation a ser funda pa Disjondrick Jacobs, un hoben cu Celebral Palsy ken, apesar di no por move independientemente, a bira un defensor inspirador pa inclusion den deporte. Determinacion y pasion di Disjondrick a yud'e participa na Ronde Van Aruba hunto cu un grupo di atletanan dedica cu a pusha su Race Cart durante henter e trayectoria. Su storia ta un testimonio di e poder di trabao den ekipo, resistencia y espirito humano.
E palabranan fuerte di Disjondrick, "Ta tuma un persona pa cuminsa algo pa otro por sigui," ta sirbi como un recordatorio cu tur hende tin e capacidad pa haci un impacto positivo den nan comunidad. CMB ta honra pa sostene tanto Beyond Sport Limits Foundation como Ronde Van Aruba, organiza pa Mariniers Kazerne Aruba, segun nan ta promove un movimiento fuerte di inclusion, dignidad y deportivismo pa tur.
Hunto, CMB, Beyond Sport Limits Foundation y Ronde Van Aruba ta kibra bareranan y empodera personanan cu limitacion fisico pa participa den deporte, desaroya confianza y crea un sentido di comunidad. “Nos ta kere cu tur hende mester tin e oportunidad pa experencia e emocion di competencia y e camaraderia di trabao den ekipo, sin importa nan limitacionnan fisico” Sr. Sr, Ilán Lopez di Caribbean Mercantile Bank N.V. ta finalisa.
CMB ta invita henter Aruba pa uni cu nos pa celebra e logronan di Disjondrick y Beyond Sport Limits Foundation, mientras nos ta sigui sostene iniciativanan cu ta promove inclusion y inspira cambio positivo den mundo di deporte y mas aleu.
