Humedad tabata asina halto na Noord y e tabata parce neblina

Diamars mainta durante mal tempo

ORANJESTAD (AAN): E biento fuerte for di Noordwest, a trece no djis hopi awacero cu lamper y strena, pero tambe a supla y pusha hopi humedad den areanan di Palm Beach, Malmok, Westpunt, Bakval, y Kamay.

   Habitantenan a splica na DIARIO, ta cu loke nan por a mira cu nan mesun wowo e mainta ey, ta comosifuera full nan bario ta bao di un capa di neblina.  Y esey por ta corecto, como cu neblina ta socede ora cu humedad ta na un nivel di 100 porciento.

   E neblina aki combina cu awacero, tabata trece situacion peligroso ora di core cu auto.  Cu e biento cu tabata pusha awa casi horizontal mes for di direccion noordwest, ta pone cu autonan mester a pone wiper na speed ‘High’ pa asina por sikiera mira unda nan ta core.

   Danki na lectornan di Westpunt cu a suministra DIARIO cu e potret di e bista masha limita mes di nan area riba Diamars mainta.