Docentenan di movimento y salud a participa den cuatro dia di entrenamento

Training di ‘Leefstijl’

ORANJESTAD (AAN): Dialuna mainta, Minister Endy Croes conhuntamente cu colega Minister Dangui Oduber, directivanan di scol, representantenan di Plataforma Scol Saludabel, maestronan di Movecion y Salud, IPA, DVG y Departamento di Asunto Social a lansa un training pa e maestronan titula “Leefstijl”.

   DIARIO a compronde cu “Leefstijl” ta un programa educativo pa stimula y guia e muchanan di un edad hoben riba tereno social y emocional, con pa haci escogencianan saludabel riba tereno fisico, nutricional y mental. Meta di e programa aki ta pa empodera muchanan pa ta resiliente y ta consciente di nan escogencianan. E training ta worde duna pa e profesional Hulandes Señora Edmee Warneke. E curso tin un duracion di 4 dia y ta tuma luga durante e siman aki. E proyecto aki ta den cuadro di Aruba su Plan Nacional di Prevencion di Malesanan no Transmisibel. E programa ta uno structural den scolnan como un materia y lo ta uno duradero.

   Minister Endy Croes a indica cu metodo aki a worde introduci na mas di 100 pais rond mundo y ta kere cu ta e momento pa duna sosten na e proyecto aki hunto cu Scol Saludabel Aruba.

   Mandatario di Enseñansa y Deporte ta convenci cu e metodo aki lo contribui en grande na Pais Aruba. “Hunto nos ta construi un miho Aruba”, Minister Endy Croes a expresa. Exito na tur maestro cu ta participando den e training aki.