Tormenta di lamper y awacero pisa a azota Aruba riba Diamars

Trafico pisa y confusion si acaso tin scol of no 

• Lamper a dal y kita coriente den varios bario
• Trafico casi no tabata move mes riba WVB Boulevard 

ORANJESTAD (AAN): Mientras cu di comienzo, e modelonan di computer tabata indica cu Tormenta Tropical Franklin lo bay dal un birada skerpi meymey di Lama Caribe y bay nort pasa directamente riba isla di Hispaniola (Haiti y Rep. Dominicana), algo inespera a socede.

   Esey ta cu aunke Tormenta Tropical Franklin a organiza su mes bastante bon, y tabata parce di ta bay acumulando forza riba Dialuna mainta, diripiente e ciclon a manera plama tiki for di otro, y bira basta desorganiza.

   Envez di move bay nort cu speed rapido, ata el a djis hisa su handrem y a cuminza zweef masha poco-poco mes den e area panort di Islanan ABC.  Aunke mayoria di su maltempo tabataa cerca di e circulacion, como tambe parti panort di e centro, toch e hecho cu el a baha velocidad bastante, a pone cu banchinan di awacero cu lamper y strena impactante a keda draai rond, y poco despues di 4:00 am di Diamars a cuminza acerca Aruba for di noordwest.

   Neishi di lamper: E imagen aki ta uno di Curaçao Radar capta un poco despues di 4:00 am, y loke ta aparece como un mancha preto riba e potret, ta e aglomeracion mal tempo intenso cu lamper y strena cu tabatin un superficie di 6.600 km2 ta acercando Aruba.  Ta comosifuera un “neishi di lamper” tabata yegando pa pasa riba e isla chikito aki.

   Pa banda di 4:40 am, ya caba lamper cu strena a cuminza dal area di Westpunt y asina poco-poco a sigui bay paden.  Nan a intensifica mas poco prome cu 6:30 am cu yobida.  Hopi hende a lanta e momento ey y core ranca plug di nan artefactonan electrico, paga airco, y tambe ranca wayanan di Internet.

   Poco despues di 7:00 am, e yobida a start masha duro mes cu biento fuerte di noordwest.  Esaki a pone cu casnan cu normalmente no ta nota ningun lek di dak of na bentana banda panort, a haya sorpresa ora awa a cuminza yena.  Negoshinan cu tin espacio di sinta pafo den aire libre, a keda azota sin fin pa biento y yobida.

   Lamper a benta coriente abao: E lampernan tabata intenso, y a cuminza dal y causa interupcion di coriente na momento cu nan a dal riba wayanan di coriente y bula fuse di transformernan di NV Elmar.

   Hendenan a raporta lamper dal hopi fuerte cerca di Boroncana, cerca di Shaba, cerca di Tarabana, cerca di Sero Pita.

    Pa 7:48 am, un lamper a dal den area di Savaneta, y esaki a bula fuse di transformernan di area di Yara y vecindario.

   Pa 8:04 am, lamper a dal y benta coriente afo na Jaburibari, Babijn, y tambe na Sero Pita y vecindario.

   Pa 8:10 am, otro lamper a cay masha duro mes, y a benta coriente afo na Paraguana y Catiri.  Casi mesun momento tambe a haya nota cu Sombre y vecindario a keda sin coriente.

   Pa 8:13 am, lamper a dal y kita coriente na Matividiri, Jamanota.  Tambe area di Angochi y Kas Ariba a keda sin coriente.

   E momento ey, tecniconan di NV Elmar lo no bay haci trabao di reconexion den e maltempo.  Pesey ora cu e yobida a lens un poco, nan a bay traha.  Ya pa 10:38 am, nan a logra pone tur e areanan afecta bek cu coriente.

   Dos barco crusero: E situacion tabata tenso riba lama!  Como cu dos barco crusero tabata batayando olanan bruto den nan intento pa yega Aruba.

   E barco Celebrity Equinox tabata programa pa tey 8:00 am na Oranjestad.  Riba su ruta, el a drenta awa teritorial di Aruba for di Noordwest, y pa 7:00 am e tabata como 35 km Noordwest di Arashi Beach.  Toch danki na su motornan potente, el a pasa door di e lama bruto cu yobida fuerte, pa asina drenta pa 8:20 am, marando na Waf di Playa.

   E barco Carnival Horizon tabata programa pa drenta 9:00 am na Oranjestad.  E tambe a drenta awa teritorial di Aruba for di Noordwest, pero e capitan a opta pa sigui move un tiki mas zuid, kizas pa evita di enfrenta coriente fuerte di lama bruto, y despues a tuma un birada mas Oost-Zuidoost pa asina yega aun mas trempan.  Danki na e capitan su intento pa yega Aruba lo mas pronto posible, el a logra esey tambe!  Ya pa 7:55 am el a mara na Waf di Playa, pues safe for di lama bruto!

   Sigur tur dos capitan y pasaheronan di ambos crusero a keda feliz cu nan ta mara safe na waf, aunke yobida constant a stroba nan paseo un poco den ciudad.  For di nan bista riba e barco, nan a observa con e Tormenta di Lamper a keda azota Aruba e mainta ey.

   Bus y docentenan den trafico: Mainta 7’or a yega y ningun hende tabata sa ainda si a caso tin scol of no.  Consecuencia di esey ta cu Busnan a cuminza core trempan caba ta recoge e poco muchanan cu nan por haya para banda di caminda pa hiba scol.

   Varios docente ya pa 7:15 am ta riba caminda, pasobra algun di nan tin di cruza brug pa yega scol te otro banda di e isla pa duna les.  Y loke nan tabata confronta riba caminda tabata e peor trafico di e prome ocho luna di aña aki.

   Como cu varios cruzada a yena cu awa di rooi, esaki tabata pone autonan ta cruza hopi poco-poco.  Esaki a bira bisto na diferente rotonde tambe.  Esaki ta crea un efecto di domino, unda chauffeurnan a keda stagna sin cu nan por a sigui move bay dilanti cu e ritmo normal... y esaki a cuminza crea rij largo cu apenas ta move.

   Prome cu 9:00 am, ainda gran parti di Watty Vos Boulevard mes tabata un rij largo di auto cu apenas ta move.  Dado momento e pida caminda entre Rotonde Sero Patrishi y Rotonde Tanki Leendert a djis keda blokea sin cu auto por a sigui pasa.

   Finalmente algun minuut prome cu 7:30 am, porfin e mensahe a drenta cu Gobierno a dicidi cu no tin scol.  E tabata dolor di cabez pa mayornan cu ya caba tabata riba caminda pa hiba muchanan scol, pues tin di dal un buelta di 180 grado pa bay bek cas.  Y bolbe bay keda pega den trafico.

   Busnan a bira un pesadiya con pa haci e maniobra pa hiba muchanan bek cas tambe.  Negoshinan si a keda draai normal, y por a mira tur lugar di bende desayuno, como tambe almuerzo hopi druk mes riba Diamars.  Y como cu awa a keda basha henter mainta pa merdia, trafico a keda core poco poco tur rond di e isla.

   Pero a lo menos, por a mira hende banda di beach cu a bay purba gara pisca.  Sin preocupa cu awa ta yobe mes.