Hulanda lo asisti Aruba cu e desaroyo di e industria agricola comercial

Ministro Geoffrey Wever:

ORANJESTAD (AAN): Minister Geoffrey Wever a anuncia cu pronto lo cuminsa cu un estudio riba e tipo di ‘greenhouses’ mas ideal, cultivonan prometedor y sondeo di metodonan di cultivo den agricultura comercial na Aruba. Esaki ta un otro colaboracion cu lo tuma luga hunto cu Hulanda como parti di e maneho di Ministerio di Asuntonan Economico, Comunicacion y Desaroyo Sostenibel pa e desaroyo di industria agricola como un pilar di nos economia. Resultado di e estudio lo bira parti di e maneho pa stimula e industria agricola.

   Un paso clave den desaroyo empresarial y uzo di tecnologia innovativo den e sector agricola ta posibel danki na e ehecucion di e ‘Plan di Accion 2023-2025: Aruba su transicion pa un modelo economico sostenibel y inclusivo’. Un di e proyectonan di e plan di accion aki ta e asina yama, ‘Agri Fund’, cu a keda estableci na Maart ultimo. Despues di un proceso legal di 2 aña, e ‘Agri Fund’ a pone un suma disponibel di 3 miyon Florin pa ofrece financiamento na un interes abao den e industria agricola, den colaboracion cu Qredits Aruba y Minister Arends. Adicionalmente, pa duna e empresarionan aki e hermentnan necesario, e ‘Agri Business Academy’ tambe a drenta den ehecucion desde 2022.

   E ‘Agri Business Academy’ ta un programa pa empresarionan cu kier cuminsa nan propio negoshi of cu tin nan negoshi caba den e sector di Agricultura y ta desea di haya mas conocemento y experiencia den e area di ‘Business Management’. Tanto ‘Agri Fund’ como tambe e ‘Agri Business Academy’ ta posibel danki na e bon cooperacion cu Qredits Aruba.

   Pa sigui pusha e desaroyo di e industra agricola como pilar economico, dia 2 di Juli ultimo riba peticion di minister Geoffrey Wever, conseho di minister a aproba e ampliacion di e Landspakket. E ampliacion aki ta encera tanto e estudio nobo aki den sector agricola cu lo cuminsa pronto y tambe e financiamiento pa ehecuta esaki. Mientrastanto, tres instituto di conocemento a worde acerca pa haci un oferta pa e estudio aki. Despues di un evaluacion mutuo, tanto Gobierno di Aruba y Hulanda a duna aprobacion pa Priva / Greengrounds ehecuta e estudio riba e uzo optimal di “greenhouses” den agricultura comercial na Aruba.

  Minister Geoffrey Wever ta gradecido pa e bon cooperacion cu Hulanda y cu hunto a logra pa haci e estudio importante aki posibel. “Mi ta contento Hulanda a kere den nos vision y pone e financiamento disponibel pa nos haci un estudio actual riba e uzo optimal di tecnologia innovativo den e industria agricola. E estudio aki ta completa tur loke mi Ministerio ta haci pa stimula e desaroyo economico y diversifica Aruba su economia” asina e mandatario a expresa.

   E aplicacion di e ‘Landspakket’ como instrumento ta trece structura pa e desaroyo di pais Aruba y ta facilita e creaccion y ehecucion di varios proyecto concreto na un manera integral. Den e trayecto di 2021 padilanti, e cooperacion cu Hulanda a resulta di ta uno positivo cu a trece beneficio den forma di experticio, ayudo financiero y asistencia  tecnico. 'Landspakket' ta un instrumento extra cu Aruba tin na su  disposicion por avansa e maneho necesario y realisa e vision economico di Aruba den bienestar di tur ciudadano, y mester percura pa continua  haci bon uzo di e cooperacion aki.