Rulienne Arends, Trahado Preventivo di FADA:
Rulienne Arends, Trahado Preventivo di FADA, a bisa den un entrevista cu den ley di tabaco ta referi na tur producto cu ta contene tabaco, incluyendo den e caso aki cigaria electronico.
E diferencia ta cu nos hobennan no ta reconoce e nomber cigaria electronico. Pa nan e vaping ta mas conoci.
“Nos mester drecha e ley di cigaria, haci’e hopi mas fuerte, mescos cu ta pa e cigaria. Pero nos ta keda para riba dje e parti di control, pasobra nos sa di varios lugar cu tin e borchi poni ‘21 aña pariba’ pa bo por cumpra un producto, pero con sigur nos ta cu ta controla y cu, eigenlijk, ta bende esaki na personanan di 21 aña p’ariba? Pasobra nos hobennan ta haya nan. Nan ta bisa nos trankil, den charla, cu nan ta cumpra nan na prijs di 10-15 florin. Eynan bo ta wak cu control no t’ey!” Rulienne Arends ta subraya.
El a agrega cu FADA, naturalmente, ta keda purba, kiermen haci di su parti, y nan tin den pipeplan pa yuda cu e borchinan di advertencia, pone nan tur caminda, pero ta keda na e companianan tambe pa zorg pa nan cumpli cu loke ley ta bisa, y di otro banda mester tin e parti di control. El a bisa cu si FADA por a haci’e y tabata tin autoridad, lo a haci’e pasobra consecuencia no ta pa aworaki mes pero aki un par di aña nos na Aruba ta bay tin un situacion serio cu problema di pulmon mirando e cantidad di hobennan cu ta bezig ta haci uso di vape. “Nan no ta wak’e como un peliger, nan no ta worry, nos a haya gruponan na scol cu gewoon no ta worry, pero e ta hopi preocupante. Atrobe, e control mester bin”, Rulienne Arends a reitera.
