Minister Dangui Oduber --- ORANJESTAD (AAN) – Riba diamars 21 di December a sali den noticia di Hulanda, noticiero NOS, cu Gemeentelijke Gezondheids Diensten (GGD) a cambia e metodo con Hulanda ta administra e vacuna.
E metodo a wordo adapta mesun cos cu di Aruba.
Pa Minister di Salud Publico Sr. Dangui Oduber esaki no a cay di sorpresa mirando tur e bon reaccion cu Aruba a ricibi for di Hulanda pa cu e plan nacional di vacunacion.
Segun e noticiero hulandes NOS, antes tabata usa e metodo ‘priklijn’, unda e persona ta yega sinta den un hoki, caminda cada hoki tin su mesun prikker (e nurse cu ta administra e vacuna).
E metodo aki tabata mas pa atende persona nan individual. Pero awendia e no ta asina mas, actualmente GGD ta uzando e mesun metodo cu ta ser uza na Aruba pa administra e vacuna. Pues nan ta uza un sala grandi caminda e prikker ta pasa cu su garoshi di stul pa stul y administra e vacuna.
Segun e noticiero e manera aki ta tuma mucho menos tempo cu ta hacie mas eficiente, consecuentemente e ta subi e capacidad di e cantidad di personanan cu por wordo geprik riba un dia.
No ta menciona nuin caminda den e noticiero cu e metodo a wordo copia for di e plan nacional di vacunacion di Aruba, pero sigur e ta yena bo di satisfaccion pa mira GGD di Hulanda haci mesun adaptacion cu ta sosodiendo na Aruba caba, segun Minister Oduber.
https://diario.aw/categories/noticia/general/hulanda-a-cambia-e-metodo-di-administracion-di-vacuna#sigProIdc93938def5