En bista di e cantidad grandi di caso di Covid --- *Ta introduci reglanan mas estricto pa biaheronan
ORANJESTAD (AAN): Crisis Team y Gobierno di Aruba a informa riba diaranson atardi pa medio di un comunicado di prensa cu en bista di e cantidad grandi di caso di Covid durante e ultimo dos dianan, tuma e decision pa para mesora e fiestanan di fin di aña cu tin programa pa e dianan nos dilanti.
Esaki ta pa e organisadornan por tene cuenta na tempo cu e decision tuma, manera a keda palabra cu organisadornan.
Mirando cu e retonan e biaha aki no ta solamente local, sino tambe di biaheronan bishitando nos isla, ta anuncia lo siguiente:
REGLANAN PA CU BIAHE FOR DI PAISNAN RIESGO HALTO
- biaheronan cu no ta residente y ta bin di paisnan di riesgo halto, mester test dentro di dos dia prome cu subi avion; pues no por test aki na Aruba mas. E regla aki lo drenta na vigor dia 27 di december proximo.
RESIDENTENAN
- ta wordo desconseha pa biaha pa paisnan di riesgo halto y hopi halto
- segura bo mes cu bo ta full vacuna prome cu biaha
- e posibilidad ta keda pa test na Aruba mes na regreso
- hasi antigen of self test 3 dia despues di yegada pa ta sigur cu bo no ta contagia
Crisis Team lo sigui monitor e situacion di cerca constantemente, pa asina por sigui ahusta e medidanan den caso cu bira necesario.
Ta haci un apelacion riba tur ciudadano pa cuida nan mes y otronan, pa asina hunto nos por supera e situacion di crisis aki.
